গুৱাহাটী: অসম সাহিত্য সভাৰ সপ্তসপ্ততিতম দ্বি-বাৰ্ষিক পাঠশালা অধিৱেশনৰ প্ৰস্তুতি তুংগত উঠিছে । ৩১ জানুৱাৰীৰ পৰা ৪ ফেব্ৰুৱাৰীলৈ পাঁচদিনীয়া কাৰ্যসূচীৰে পাঠশালাৰ ভট্টদেৱ ক্ষেত্ৰত অসম সাহিত্য সভা অধিবেশন অনুষ্ঠিত হ'ব । এই কথা সদৰী কৰে অসম সাহিত্য সভাৰ সপ্তসপ্ততিতম পাঠশালা অধিৱেশনৰ প্ৰচাৰ উপ-সমিতিয়ে ।
বুধবাৰে অসম সাহিত্য সভাৰ গুৱাহাটীৰ কাৰ্যালয়ত সংবাদমেল সম্বোধন কৰি প্ৰচাৰ উপ-সমিতিৰ সভাপতি ড৹ মনোৰঞ্জন দাসে কয়, "৩১ জানুৱাৰীৰ পুৱা ৮:৩০ বজাত নামঘৰৰ দ্বাৰ মুকলি হোৱাৰ লগতে ৯ বজাত ভট্টদেৱ ক্ষেত্ৰ আৰু মূল তোৰণ উদ্বোধন কৰাৰ পিছতেই বিজ্ঞানমেলা, গ্ৰন্থ মেলা, প্ৰদৰ্শনী, বজালীহাট উদঘাটন কৰা হ'ব । তদুপৰি সেইদিনা অন্যান্য কাৰ্যসূচীৰ লগতে সাংস্কৃতিক অনুষ্ঠান অনুষ্ঠিত হ'ব ।"
তেওঁ লগতে জনাই, "পহিলা ফেব্ৰুৱাৰীত পুৱা সাহিত্য সভাৰ পতাকা উত্তোলন কৰাৰ পিছতেই অন্যান্য কাৰ্যসূচী থাকিব । ২ ফেব্ৰুৱাৰীত অসম সাহিত্য সভাৰ নৱ-নিৰ্বাচিত সভাপতিক লৈ শোভাযাত্ৰা কৰা হ'ব । এই শোভাযাত্ৰা গীতাশ্ৰমৰ পৰা আৰম্ভ হৈ ভট্টদেৱ ক্ষেত্ৰত সামৰণি পৰিব । এই শোভাযাত্ৰাত ২০-২৫ হাজাৰ লোকৰ সমাগম হ'ব বুলি আশা কৰা হৈছে ।"
লগতে সভাপতি দাসে কয়, "তদুপৰি সাহিত্য সভা অধিৱেশনত ৮৭ বৰ্গফুটৰ এটা জাপি প্ৰদৰ্শন কৰা হ'ব । এই জাপিটো লিমকা বুক অফ ৰেকৰ্ডত (Limca Book of Records ) স্থান পাব । ইয়াৰোপৰি সাহিত্য সভাৰ অধিৱেশনত পুতলা নাচ, জুনা নাম, বীৰ নাম , নাগাৰা নাম, ওজাপালি আদিকে ধৰি আলোচনা চক্ৰ আদি বিভিন্ন কাৰ্যসূচী অনুষ্ঠিত হ'ব । ৭-১০ কোটি টকাৰ বাজেটেৰে আয়োজন কৰা এইবাৰ সাহিত্য সভাত ৬ খন মঞ্চ থাকিব ।"
লগতে উদ্যোক্তাসকলে জনাই যে এইবাৰ সাহিত্য সভাৰ স্থলীত ১০ হাজাৰ মানুহে একেলগে খাদ্য গ্ৰহণৰ ব্যৱস্থা কৰা হৈছে । অধিৱেশনত তিনিখন ভ্ৰাম্যমাণ থিয়েটাৰ প্ৰদৰ্শন হ'ব । অধিৱেশনত এইবাৰ প্ৰথমবাৰৰ বাবে অনুষ্ঠিত হ'বলগীয়া আন্তঃৰাষ্ট্ৰীয় পৰ্যায়ৰ বিজ্ঞান মেলাত নেপাল, ভূটান, অৰুণাচলকে ধৰি চুবুৰীয়া ৰাজ্য ৰাষ্ট্ৰই অংশগ্ৰহণ কৰিব । বিজ্ঞান মেলা প্ৰতিৰক্ষা বিভাগৰ বিভিন্ন সামগ্ৰী প্ৰদৰ্শন কৰা হ'ব ।
