নলবাৰী, 19 ডিচেম্বৰ : শনিবাৰে নলবাৰীত অসমীয়া সাহিত্যৰ অন্যতম গল্পকাৰ, গৱেষণা অধ্যয়নৰ মাৰ্গনিৰ্দেশক, শিক্ষাবিদ, সমাজ নিৰ্মাতা আৰু অসম সাহিত্য সভাৰ প্ৰতিষ্ঠাপক সম্পাদক শৰৎ চন্দ্ৰ গোস্বামীৰ স্মৃতি দিৱস পালন কৰা হয় ৷ নলবাৰী জিলা সাহিত্য সভাৰ সৌজন্যত আৰু নন্দন শাখা সাহিত্য সভাৰ উদ্যোগত উদযাপন কৰা হয় স্মৃতি দিৱস ৷ নলবাৰী জিলা সাহিত্য সভাৰ কাৰ্যালয় প্ৰাংগনত অনুষ্ঠিত স্মৃতি দিৱসৰ আৰম্ভণিতে শৰৎ চন্দ্ৰ গোস্বামীৰ আৱক্ষ মূৰ্তিত মাল্যাৰ্পন কৰে অসম সাহিত্য সভাৰ ৰামধেনু উপ-সমিতিৰ আহ্বায়ক মহম্মদ মানিক আহমেদে ৷ শৰৎ চন্দ্ৰ গোস্বামীৰ প্ৰতিচ্ছবিত বন্তি প্ৰজ্বলন কৰে সমাজকৰ্মী মুকুল গোস্বামীয়ে আৰু মাল্যাৰ্পন কৰে নন্দন শাখা সাহিত্য সভাৰ উপ-সভাপতি ড৹ ৰীতামণি দাসে ৷
পৰৱৰ্তী সময়ত নলবাৰী জিলা সাহিত্য সভাৰ সভাপতি ধ্ৰুৱজ্যোতি শৰ্মাৰ সভাপতিত্বত অনুষ্ঠিত স্মৃতিচাৰণ আৰু গ্ৰন্থ উন্মোচনী সভাত গুৱাহাটী বিশ্ববিদ্যালয়ৰ অধ্যাপক ড৹ উমেশ ডেকা, অসম সাহিত্য সভাৰ মুখপাত্ৰ ড৹ সঞ্জীৱ শৰ্মা, পত্ৰিকা সম্পাদক ড৹ উপেন্দ্ৰজিৎ শৰ্মা, সাংগঠনিক সম্পাদক গোবিন্দ কলিতা, কেন্দ্ৰীয় কাৰ্যনিৰ্বাহক সদস্য ড৹ বিপিন কলিতাকে ধৰি কেইবাগৰাকীও বিশিষ্ঠ ব্যক্তি উপস্থিত থাকে ৷ নলবাৰী জিলা সাহিত্য সভাৰ সম্পাদক পংকজ বেজবৰুৱাই আঁত ধৰা সভাত শিক্ষাব্ৰতী হিমানী দেৱীৰ "আইনা" শীৰ্ষক এখন কাব্যগ্ৰন্থও উন্মোচন কৰা হয় ৷
লগতে পঢ়ক: ২৭ নং কাকী তিৱা পৰিষদীয় সমষ্টিত কংগ্ৰেছ প্ৰাৰ্থী বিজুমণি বৰদলৈৰ জয়লাভ
