নলবাৰী, ২৩ জুন : বৃহস্পতিবাৰৰ পৰা নলবাৰীৰ মুকালমুৱা মহকুমা অসামৰিক চিকিৎসালয়ৰ নৱ নিৰ্মিত ভৱনত চিকিৎসা সেৱা আৰম্ভ কৰা হয় (New Building of Mukalmua Hospital Opening) । বৰক্ষেত্ৰীৰ প্ৰাণকেন্দ্ৰ মুকালমুৱা সামূহিক চিকিৎসালয় চৌহদত চিকিৎসালয়খন অসামৰিক চিকিৎসালয়লৈ উন্নত কৰি ২০১৯ চনৰ ৮ মাৰ্চ তাৰিখে সেই সময়ৰ অসম চৰকাৰৰ ৰাজ্যিক স্বাস্থ্যমন্ত্ৰী পীযুষ হাজৰিকাই গৃহটোৰ আধাৰশিলা স্থাপন কৰিছিল ।
অসামৰিক চিকিৎসালয়ৰ ভৱনটো প্ৰায় ডেৰ বছৰ পূৰ্বে নিৰ্মাণ সম্পূৰ্ণ হৈছিল ৷ কিন্তু বিভাগীয় বিষয়া আৰু ঠিকাদাৰৰ হেমাহিৰ বাবে চিকিৎসালয়খনৰ মৰ্গ, চিকিৎসালয়লৈ যোৱা পথ আদিৰ আনুসংগিক কাম এতিয়াও সম্পূৰ্ণ হোৱা নাই । এই অভিযোগ অঞ্চলবাসীৰ ৷ ইপিনে পুৰণি গৃহসমূহ জহি খহি যোৱাৰ ফলতো অস্বাস্থ্যকৰ পৰিৱেশতে চিকিৎসালয়খনত চিকিৎসা সেৱা আগবঢ়াব লগা হৈছিল ।
শেহতীয়া কৃত্ৰিম বানৰ সময়ত চিকিৎসালয়খনৰ ঔষধ মজুত ৰখা গৃহ, প্ৰসূতি চিকিৎসা গৃহ আদি বিভিন্ন গৃহত পানী সোমাইছিল ।
সেই সময়তে চিকিৎসালয়ৰ চিকিৎসা সম্পৰ্কীয় সকলো কাম-কাজ অসামৰিক চিকিৎসালয়ৰ বাবে নিৰ্মিত ভৱনলৈ স্থানান্তৰৰ দাবী উত্থাপন কৰিছিল একাংশ ৰাইজে । সেই মৰ্মে বৃহস্পতিবাৰে বৰক্ষেত্ৰী সমষ্টিৰ বিধায়ক দিগন্ত বৰ্মনে নলবাৰী জিলাৰ যুটীয়া স্বাস্থ্য সঞ্চালক উমেশ ফাংচুৰ উপস্থিতিত নৱ নিৰ্মিত ভৱনটোৰ শুভ উদ্বোধন কৰে ৷
লগতে পঢ়ক : ৪ শিক্ষাৰ্থীৰে এখন চৰকাৰী স্কুল পুনৰুজ্জীৱিতকৰণৰ নিৰলস প্ৰচেষ্টা ২ শিক্ষকৰ
চিকিৎসালয় পৰিচালনা সমিতিৰ সদস্য তথা জ্যেষ্ঠ সাংবাদিক প্ৰদীপ কুমাৰ কলিতাই উক্ত সভাতেই ক্ষোভ ব্যক্ত কৰি অসামৰিক চিকিৎসালয়ৰ নিৰ্মাণৰ কোনো তথ্য আজিলৈ সদৰি নকৰা সংক্ৰান্তত এক প্ৰশ্ন উত্থাপন কৰে ৷ যাৰ প্ৰশ্নৰ উত্তৰত যুটীয়া স্বাস্থ্য সঞ্চালকগৰাকীয়ে বিভাগীয় ব্যৰ্থতাৰ কথা স্বীকাৰ কৰি অসামৰিক চিকিৎসালয়খনৰ লগতে আনুষংগিক বহু কাম এতিয়াও বাকী থকাৰ কথা উল্লেখ কৰে ।
লগতে সঞ্চালকগৰাকীয়ে চিকিৎসালয়খনত পৰ্যাপ্ত চিকিৎসক তথা কৰ্মচাৰী পৰ্যায়ক্ৰমে বিভাগীয়ভাৱে নিয়োগ কৰা হ’ব বুলি ব্যক্ত কৰে । ইপিনে সম্পূৰ্ণকৈ চাফ-চিকুণ নকৰাকৈ চিকিৎসা সেৱা আৰম্ভ কৰাক লৈও প্ৰতিক্ৰিয়া ব্যক্ত কৰি চিকিৎসালয়খন চাফ-চিকুণ কৰাৰ আদেশ দিয়ে ৷ লগতে প্ৰয়োজনীয় আঁচ-বাব আদি অনতি পলমে বিভাগীয়ভাৱে যোগান ধৰা হ’ব বুলি ব্যক্ত কৰে স্বাস্থ্য সঞ্চালক উমেশ ফাংচুৱে ৷
লগতে পঢ়ক : Flood in Assam 2022: কপিলীত জাহ গ’ল লংকাৰ এখন গাঁও
