নলবাৰী,20 ডিচেম্বৰঃ সংশোধিত নাগৰিকত্ব আইনৰ বিৰুদ্ধে চৌদিশ প্ৰতিবাদমুখৰ হৈ থকাৰ সময়তে নলবাৰীত বিজেপিয়ে ঐক্য সমদলৰ আয়োজন কৰে । গৰ্ডন স্কুল খেলপথাৰত অনুষ্ঠিত এই সমদলত অসম বিধানসভাৰ প্ৰায় সংখ্যক নেতা-মন্ত্ৰী উপস্থিত থাকে । কোনো ধৰণৰ শ্ল'গান ব্যৱহাৰ নকৰাকৈ বিজেপিয়ে এই সমদল উলিয়ায় ৷ সমদলটো চহৰখনৰ বৰমা ৰোড অতিক্ৰম কৰি ৩১ নং ৰাষ্ট্ৰীয় ঘাইপথেৰে জিলা আৰক্ষী অধীক্ষকৰ খেলপথাৰত সামৰণি পৰে ।
মুখ্যমন্ত্ৰী সৰ্বানন্দ সোণোৱালে উদ্বোধন কৰা সমদলটোত দেখা যায় মন্ত্ৰী হিমন্ত বিশ্ব শৰ্মা,ভৱেশ কলিতা,ৰঞ্জিত দাস,চন্দ্ৰমোহন পাটোৱাৰী আদিক ৷ তদুপৰি সাংসদ দিলীপ শইকীয়া,বিধায়ক অশোক শৰ্মা,বৰক্ষেত্ৰীৰ বিধায়ক নাৰায়ণ ডেকাই উক্ত কাৰ্যসূচীত অংশ লয় ৷ বিজেপিৰ কৰ্মকৰ্তাসকলেও এই কাৰ্যসূচীত সহযোগ কৰে ৷ আনহাতে নলবাৰীৰ পৰা আৰম্ভ হোৱা এই সমদল অসমৰ বিভিন্ন জিলা অনুষ্ঠিত হ’ব বুলি উল্লেখ কৰে উপস্থিত বিজেপিৰ নেতা-মন্ত্ৰীয়ে ।
ৰাজ্যজুৰি হৈ থকা সংশোধনী নাগৰিকত্ব আইন বিৰোধী আন্দোলনৰ বাবে পুনৰ বিজেপিয়ে ২৭ তাৰিখে ঐক্য সমদলৰ কাৰ্যসূচী হাতত ল’ব ৷ পৰৱৰ্তী সময়ত জাগীৰোড,মৰিগাঁও,ধেমাজি,ডিফু,তেজপুৰৰ লগতে অসমৰ ৮ খন জিলাত বিজেপিয়ে আয়োজন কৰিব এই সমদলৰ ।
লগতে চাওকঃঅসমত অসমীয়া ভাষা সৰ্বকালৰ বাবে ৰাজ্যিক ভাষা হৈ থাকিবঃ মুখ্যমন্ত্ৰী
