নলবাৰী,16 মাৰ্চঃ অসম বিধানসভা নিৰ্বাচনৰ দ্বিতীয় পৰ্যায়ৰ নিৰ্বাচনৰ বাবে নলবাৰীত বিজেপি, কংগ্ৰেছ ,অসম জাতীয় পৰিষদকে ধৰি ভিন্ন দলে নিৰ্বাচনী প্ৰচাৰ তীব্ৰতৰ কৰি তুলিছে । নলবাৰী সমষ্টিৰ ভাৰতীয় জনতা পাৰ্টীৰ মিত্ৰজোঁটৰ প্ৰাৰ্থী জয়ন্ত মল্ল বৰুৱাই লাভ কৰিছে প্ৰাৰ্থিত্ব ৷ প্ৰাৰ্থীগৰাকীলৈ সমৰ্থন আগবঢ়াই বিৰোধী দলসমূহৰ বহু কৰ্মী-নেতাই যোগদান আৰম্ভ কৰিছে গেৰুৱা দলটোত ৷ মঙলবাৰে নলবাৰী সমষ্টিলৈ নিৰ্বাচনী প্ৰচাৰ চলাবলৈ আহি মহাৰাষ্ট্ৰৰ প্ৰাক্তন মুখ্যমন্ত্ৰী দেবেন্দ্ৰ ফাড়নাভিছ উপস্থিত হয় বৰাজোল হাইস্কুলৰ খেলপথাৰত ।
উক্ত খেলপথাৰত কেইবা হাজাৰ ৰাইজৰ উপস্থিতি দেখি বিজেপিৰ কৰ্মকৰ্তাসকলৰ উৎসাহ বৃদ্ধি হোৱা দেখা যায় । পূৱ নলবাৰী অঞ্চলৰ অগপ-কংগ্ৰেছ দলৰ প্ৰতি মোহভংগ হৈ বহুসংখ্যক কৰ্মীয়ে বিজেপিৰ প্ৰাৰ্থী জয়ন্ত মল্ল বৰুৱাৰ নেতৃত্বৰ প্ৰতি মোহিত হৈ মহাৰাষ্ট্ৰৰ প্ৰাক্তন মুখ্যমন্ত্ৰীগৰাকীৰ উপস্থিতিত যোগদান কৰে বিজেপিত ।
