নলবাৰীত প্ৰসাদত বিষক্ৰিয়া, অসুস্থ ১৩ৰো অধিক

নলবাৰীত পূজাৰ প্ৰসাদ খাই অসুস্থ কেইবাজনো লোক , চিকিৎসালয়ত পৰ্যাপ্ত বিচনাৰ অভাৱত মজিয়াতে শুই চিকিৎসা গ্ৰহণ ৰোগীৰ

নলবাৰী, 20 আগষ্টঃ নলবাৰীত পূজাৰ প্ৰসাদ খাই অসুস্থ কেইবাজনো লোক ৷শনিবাৰে জিলাখনৰ পৰা কিছু নিলগত অৱস্থিত তিলানা গাঁৱৰ দিনেশ বৰুৱা নামৰ এজন লোকৰ ঘৰত সত্য নাৰায়ণ পূজাৰ বুট-মাহ আৰু পিঠাগুড়ি খোৱাৰ পাছৰে পৰা শিশু আৰু মহিলাসহ তেৰ জনতকৈও অধিক লোকৰ পেট চলা আৰম্ভ কৰে ৷ পৰৰ্ৱতী সময়ত অৰ্থাৎ সোমবাৰে সন্ধিয়া আক্ৰান্ত সকলো লোককে নলবাৰী অসামৰিক চিকিৎসালয়ত ভৰ্তি কৰোৱা হয় ৷

ইফালে পৰ্যাপ্ত বিচনাৰ অভাৱত ৰোগী সকলে মজিয়াতে শুই চিকিৎসা গ্ৰহণ কৰিব লগা হৈছে ৷ যি সময়ত অসম চৰকাৰে ৰাজ্যৰ স্বাস্থ্য খণ্ডৰ ব্যাপক উন্নয়নৰ কথাৰে বিভিন্ন আঁচনি ঘোষণা কৰা দেখিবলৈ পোৱা যায় সেই সময়ত নলবাৰীৰ দৰে এখন আগশাৰীৰ চহৰত থকা চিকিৎসালয়ৰ এনে অৱস্থাই চকু কপালত তুলিছে সচেতন মহলৰ ৷