নলবাৰী, 27 অক্টোবৰঃ গোৱালপাৰাৰ ডিটেনশ্বন কেম্পত বন্দী হৈ থকা অৱস্থাত ফালু দাসৰ মৃত্যুক কেন্দ্ৰ সৃষ্টি হোৱা প্ৰতিক্ৰিয়া আজিও অব্যাহত আছে । জি এম চি এইচত চিকিৎসাধীন অৱস্থাতে মৃত্যুবৰণ কৰা নলবাৰী জিলাৰ মুকালমুৱা থানাৰ অন্তৰ্গত চতেমাৰী গাঁৱৰ দৰিদ্ৰ পৰিয়ালৰ ফালু দাসৰ মৃতদেহ পৰিয়ালৰ লোকে চমজি ল'বলৈ অস্বীকাৰ কৰাত আজিলৈকে চিকিৎসালয়খনৰ মৰ্গতে পৰি ৰৈছে লোকজনৰ মৃতদেহ ৷ নিশা ভূক্তভুগী পৰিয়ালটোৰ বাসগৃহত উপস্থিত হয় কৰিমগঞ্জৰ বিধায়ক কমলাক্ষ দে পুৰকায়স্থ ৷ বিধায়কগৰাকীয়ে কয় যে, শাসনাধীন চৰকাৰখনে মানুহক বিদেশী সজাই ডিটেনচন কেম্পত বন্দী কৰি ৰাখে আৰু মৃত্যুৰ পিছত স্বদেশী সজাই নিজ নিজ বাসগৃহত মৃতদেহ থৈ যাব খোজে ৷ ডিটেনচন কেম্পত লোক সকলক উপযুক্ত চিকিৎসা প্ৰদান নকৰাৰ বাবেই তিল তিলকৈ মৃত্যুমুখত পৰিছে বুলি অভিযোগ উত্থাপন কৰিছে বিধায়কগৰাকীয়ে ৷
উল্লেখ যোগ্য যে, জিলা প্ৰশাসন তথা আৰক্ষী প্ৰশাসনে ফালু দাসৰ মৃতদেহ পৰিয়ালটোক চমজি ল'বলৈ বাৰম্বাৰ অনুৰোধ জনোৱাৰ পিছতো প্ৰশাসনৰ এনে অনুৰোধ মানি ল'বলৈ অমান্তি হোৱাত বিষয়টোৱে জটিলতাৰ সৃষ্টি কৰিছে ৷ বিভিন্ন দল-সংগঠনৰ প্ৰতিনিধি দুৰ্ভগীয়া পৰিয়ালটোৰ বাসগৃহত উপস্থিত হৈ খা-খবৰ লোৱাৰ লগতে পৰিস্থিতিৰ বুজ লৈছে ৷
