নগাঁও,13 এপ্ৰিল: ফ্লপ শ্ব'ত পৰিণত বিজেপিৰ সংকল্প সমাৰোহ ৷ প্ৰফুল্ল কুমাৰ মহন্তৰ সমষ্টি বঢ়মপুৰৰ কামপুৰত অনুষ্ঠিত সভাত বহু সংখ্যক খালী চকীৰ মাজতে ৰূপক শৰ্মাৰ হৈ নিৰ্বাচনী প্ৰচাৰ চলাই মোডী বন্দনাত বিভোৰ মুখ্যমন্ত্ৰী সৰ্বানন্দ সোণোৱাল ।
ৰাজ্যৰ মুখ্যমন্ত্ৰীজনৰ নিৰ্বাচনী সভা । চকী প্ৰায় তিনি হাজাৰখন । ৰহা আৰু বঢ়মপুৰ সমষ্টিৰ ভিত্তিত অনুষ্ঠিত সভাখনত বহু সংখ্যক খালী চকীৰ মাজতে ৰাইজৰ আগত ভাষণ ৰাখিলে মুখ্যমন্ত্ৰী সৰ্বানন্দ সোণোৱালে ।
উল্লেখ্য যে,প্ৰচাৰ সভাখনৰ বাবে বিগত তিনি-চাৰিদিন ধৰি চলোৱা হৈছিল ব্যাপক প্ৰচাৰ ৷ কিন্তু বিজেপিৰ ব্যাপক প্ৰচাৰৰ পাচতো সভাত খালী হৈ পৰি থাকিল বহু চকী ৷ পাচে, আশা এৰা নাই মুখ্যমন্ত্ৰীগৰাকীয়ে ৷ বঢ়মপুৰ সমষ্টিৰ পৰা ডেৰলাখ ভোট পোৱাৰ আশা কৰিলে মুখ্যমন্ত্ৰীজনে ৷ সভাত বিজেপিৰ প্ৰাৰ্থী ৰূপক শৰ্মাক ৰাইজৰ পৰা আশীৰ্বাদ ল'বলৈ কৈ হাত যোৰ কৰি ৰাইজৰ পৰা ভোট ভিক্ষা কৰে মুখ্যমন্ত্ৰীগৰাকীয়ে ৷
ইফালে সভাখনত পিচৰ শাৰীত বহি একপ্ৰকাৰ এলাগি হৈ পৰিল এসময়ৰ নগাঁৱৰ বিজেপিৰ গুৰি ধৰোতা তথা বিশ বছৰীয়া নগঞা সাংসদ ৰাজেন গোঁহাই । ইয়াৰ বিপৰীতে কিন্তু সভাখনৰ সকলো দিশতে আগভাগ লয় বিৰ্তকিত ব্যৱসায়ী জিতু গোস্বামীয়ে ।
