নলবাৰী, 29 আগষ্ট: মঞ্চ এৰি এতিয়া তেওঁৰ পৰিচয় পদপথৰ চাহ দোকানী হিচাপে ৷ অন্য শিল্পীসকলৰ লেখীয়াকৈ এইগৰাকী শিল্পীকো আৰ্থিকভাৱে জুৰুলা কৰিছে কাল কৰ’ণাই(Corona) ৷ ‘‘নাটক আমাৰ অক্সিজেন, আমাক নাটক কৰিবলৈ দিয়ক’’ ৷ পদপথত চাহ বেছি এইদৰে হতাশাত ভাগি পৰিছে অভিনেতাগৰাকীয়ে ৷
কৰ’ণাই আৰ্থিকভাৱে দুৰ্দশাগ্ৰস্ত কৰাৰ ফলত পদপথত চাহ বিক্ৰী কৰি জীৱন সংগ্ৰাম চলাইছে অভিনেতাগৰাকীয়ে ৷ এয়া কোনো চিনেমা অথবা নাটকৰ ঘটনা নহয় ৷ এয়া হৈছে ‘চুৰেণ’ৰ ৰিয়েল লাইফৰ কাহিনী ৷ আমি ক’ব বিচাৰিছো সম্প্ৰতি টেলিভিশ্বনত প্ৰচাৰিত জনপ্ৰিয় ধাৰাবাহিক ‘ৰাখে হৰি মাৰে কোনে’ৰ চুৰেণ ওৰফে ভাস্কৰ বৰ্মনৰ কথা ৷
অভিনয়ৰ জৰিয়তে জনপ্ৰিয়তা অৰ্জন কৰিবলৈ সক্ষম হোৱা চুৰেণক ধাৰাবাহিকখনত দেখুওৱাৰ লেখীয়াকৈ বাস্তৱতো আৰ্থিক দৈন্যতাই জুৰুলা কৰিছে ৷ সম্প্ৰতি অভিনেতাগৰাকীৰ জীৱিকা নিৰ্বাহৰ সমল হৈছে এখন ক্ষুদ্ৰ চাহৰ দোকান ৷ পদপথত চাহ বেছি হতাশাত ভাগি পৰিছে অভিনেতাগৰাকী ৷
কাল কৰ’ণাই আৰ্থিকভাৱে দুৰ্দশাগ্ৰস্ত কৰাৰ ফলত এনেদৰেই জীৱন সংগ্ৰাম চলাবলৈ বাধ্য হৈছে অভিনেতা ভাস্কৰ বৰ্মনে ৷ বহুকেইখন অসমীয়া বোলছবি, ধাৰাবাহিক তথা ভ্ৰাম্যমান থিয়েটাৰৰ অভিনেতাগৰাকীৰ পৰিচয় হৈ পৰিছে পদপথৰ ব্যৱসায়ী ৷ কৰ’ণা মহামাৰীয়ে দিশহাৰা কৰা অভিনেতাগৰাকীয়ে উপায়হীনহীন হৈ অন কেমেৰাত ক’লে জীৱনৰ চূড়ান্ত সিদ্ধান্ত লোৱাৰ কথা ৷
বৃহত্তৰ ভ্ৰাম্যমাণ নাট্যদলকে ধৰি বিভিন্ন ধাৰাবাহিকত অভিনয় কৰি দৰ্শকক হহুৱাবলৈ সক্ষম হোৱা অভিনেতা ভাস্কৰ বৰ্মনে 1989 চনত জ্যোতিৰূপা থিয়েটাৰৰ যোগেদি ভ্ৰাম্যমাণত খোজ পেলাইছিল । কিন্তু বিগত দুবছৰ ধৰি নাট্যদলসমূহ বন্ধ হৈ থকাৰ বাবে আৰ্থিক উপাৰ্জনো বন্ধ হৈ পৰে অভিনেতাগৰাকীৰ ৷
উপায়হীন হৈ তেওঁ মুকালমুৱাৰ জয়সাগৰস্থিত টাপাট্টাৰীত সহযোগী শিল্পী নৱাব হুছেইনৰ সৈতে চাহ ব্যৱসায়ত নামি পৰিছে ৷ পৰিয়াল চলাবলৈ প্লাষ্টিকৰ চালিৰ তলতে চাহৰ দোকান দিছে দুয়োগৰাকী শিল্পীয়ে ৷ ক’ভিড পৰিস্থিতিৰ সৈতে যুঁজি যুঁজি হাৰ মনা শিল্পী ভাস্কৰ বৰ্মনে শিল্পীসকলৰ বাবে আমাক ঋণ মোকলাবলৈ চৰকাৰক কাতৰ আহ্বান জনাইছে ।
কিয়নো উপাৰ্জন অবিহনে পৰিয়াল পোহপাল দিয়াত ব্যৰ্থ হৈছে শিল্পী সমাজ ৷ ইফালে জীৱনৰ অধিকতৰ সময় ভ্ৰাম্যমাণত পাৰ কৰা অভিনেতাগৰাকীয়ে পুনৰ নাট্যদলসমূহ খুলি দিবলৈও আহ্বান জনাইছে ৰাজ্য চৰকাৰক ৷ অভিনয়কে জীৱনৰ সাৰথি হিচাপে লোৱা এইসকল অভিনেতাৰ বাবে চৰকাৰ তথা সংশ্লিষ্ট বিভাগৰ কৰণীয় কি?
আশ্বাসতে সীমাৱদ্ধ থাকিব নেকি এইসকল শিল্পী ? আনক হহুবাই নিজে কান্দি থকা শিল্পীসকলৰ প্ৰতি দৰদ হ’বনে চৰকাৰ কিম্বা জন প্ৰতিনিধি? নে কেটেলীতে আবদ্ধ হৈ ৰ’ব জীৱন তেওঁলোকৰ দুৰ্বিসহ জীৱন?
লগতে পঢ়ক: কোনে ৰচনা কৰিছিল পাপনৰ জনপ্ৰিয় গীত ‘শ্যামৰায় কলিয়া’ ?
