ৰূপজ্যোতি কুৰ্মীক চিনি নাপায় মন্ত্ৰী ভৱেশ কলিতাই

বিৰোধীক সমালোচনা জলসিঞ্চন মন্ত্ৰীৰ ৷ ক’লে নতুন বাজেটৰ জৰিয়তে আগবাঢ়ি যাব দেশৰ মহিলাসকল ৷

নলবাৰী, 6 জুলাইঃ জলসিঞ্চন মন্ত্ৰী ভৱেশ কলিতাৰ বাবে পৰিচিত নহয় মৰিয়নীৰ বিধায়ক ৰূপজ্যোতি কুৰ্মী ৷ যি সময়ত কংগ্ৰেছৰ বিধায়ক জনৰ বিজেপিত যোগদানৰ বাতৰিৰ সংবাদ মাধ্যমত ব্যাপক চৰ্চিত হৈছে আছে তেনে এক সময়তে মন্ত্ৰী গৰাকীৰ এই মন্তব্যই বিভিন্ন মহলত সৃষ্টি কৰিছে প্ৰতিক্ৰিয়াৰ ৷ সভাত নিজৰ ভাষণত মন্ত্ৰীগৰাকীয়ে কয় যে অসমৰ কাৰণে যদি চিন্তা কৰা দল আছে সেইটো হ'ল বিজেপি দল ৷ তেওঁৰ মতে বিজেপি দল কেৱল ভাৰতৰে নহয় পৃথিৱীৰ ভিতৰতে এক বিশাল ৰাজনৈতিক দল ৷ সভাত বিধায়ক ৰূপজ্যোতি কুৰ্মীৰ বিজেপি আগমনৰ বাতৰিৰ ওপৰত নিজৰ প্ৰতিক্ৰিয়া ব্যক্ত কৰি কয় যে, ৰূপজ্যোতি কুৰ্মী কোন তেওঁ চিনি নাপায় ৷ কেৱল কুৰ্মীয়ে নহয় সময়ত সকলোৰে বিজেপিলৈ আগমন ঘটিব বুলি তেওঁ দৃঢ় বিশ্বাসী ৷ মন্ত্ৰী গৰাকীয়ে লগতে কয় যে অসমত তিনি বছৰ শাসন কালত বিজেপিয়ে অন্য দলক তিনি গল দিছে আৰু বাকী থকা দুবছৰত দুই গল দি নিজৰ স্ক’ৰ পাঁচ গল লৈ বৃদ্ধি কৰিব ৷

সদ্যঘোষিত কেন্দ্ৰীয় বাজেট সম্পৰ্কে মন্ত্ৰী কলিতাই কয় যে, নতুন বাজেটে সমগ্ৰ দেশক চুই গৈছে ৷ এই বাজেটৰ দ্বাৰা ভাৰতবৰ্ষৰ মহিলাসকল আগবাঢ়ি যাব পাৰিব বুলি তেওঁ আশা প্ৰকাশ কৰে ৷ উল্লেখযোগ্য যে, শুকুৰবাৰে নলবাৰীৰ টিহুৰ নাথকুছিত জলসিঞ্চন বিভাগৰ দ্বাৰা পুনৰ নিৰ্মাণ কৰা জিৰণি চ’ৰা উদ্বোধন কৰে জলসিঞ্চন মন্ত্ৰী ভৱেশ কলিতাই ৷ সভাত নলবাৰী জিলা পৰিষদৰ সভাপতি নিতুল ডেকাৰ লগতে বিভাগৰ কাৰ্যবাহী অভিযন্তা সত্যনাথ কলিতাৰ আৰু আন বহুতো বিশিষ্ট ব্যক্তি উপস্থিত থাকে ৷ মন্ত্ৰীগৰাকীৰ এই মন্তব্যৰ প্ৰতিক্ৰিয়া হিচাপে বিধায়ক কুৰ্মীয়ে কি প্ৰতিক্ৰিয়া প্ৰকাশ কৰে সেইয়া হে হ'ব লক্ষণীয় ৷

নলবাৰীৰ টিহুৰ নাথকুছিত জলসিঞ্চন বিভাগৰ পুনৰ নিৰ্মিত জিৰণি চৰা উদ্বোধন কৰি মৰিয়নীৰ বিধায়ক ৰূপজ্যোতি কুৰ্মী কোন বুলি মন্তব্য কৰে ৷