নলবাৰী, 12 মাৰ্চ : তিনিদিনে সন্ধান নাই পঞ্চাশ ঊৰ্ধৰ মহিলা বিশ্বকা দেৱীৰ (Missing Biswaka Devi for three days) ৷ বিগত 9 মাৰ্চৰ সন্ধানহীন হৈ আছে নলবাৰী জিলাৰ ধমধমা আৰক্ষী চকীৰ অন্তৰ্গত ৰঙাফালি গাঁৱৰ ধৰণী দেৱনাথৰ পত্নী বিশ্বকা দেৱী (৫০) ৷ সমগ্ৰ ঘটনাক কেন্দ্ৰ কৰি অঞ্চলটোত সৃষ্টি হৈছে তীব্ৰ চাঞ্চল্যৰ ৷
উল্লেখ্য যে, চলিত মাহৰ ৯ তাৰিখে পুৱা প্ৰায় ৬ বজাত বিশ্বকা দেৱীয়ে বৰপেটাৰোডস্থিত নিজ কন্যাৰ গৃহলৈ বুলি ওলাই গৈছিল ৷ কিন্তু উক্ত দিনা সন্ধিয়াৰ ভাগলৈকে মহিলাগৰাকীয়ে কন্যাৰ ঘৰ গৈ নপোৱাত পৰিয়ালৰ মাজত এক হাহাকাৰময় পৰিৱেশৰ সৃষ্টি হয় । এই ঘটনাৰ পিছৰে পৰাই সন্ধানহীন হৈ আছে মহিলাগৰাকী ।
বহু সময়লৈকে মহিলাগৰাকীৰ কোনো সম্ভেদ নাপায় পৰিয়ালৰ লোকে কাষ চাপে আৰক্ষীৰ ৷ ১০ মাৰ্চত ধমধমা আৰক্ষী চকীত এই সন্দৰ্ভত পৰিয়ালৰ লোকে দাখিল কৰে এজাহাৰ । ধমধমা আৰক্ষীয়ে এই সন্দৰ্ভত গোচৰ ৰুজু কৰিছে যদিও বৰ্তমানলৈকে মহিলাগৰাকীৰ কোনো সম্ভেদ উলিয়াবলৈ সক্ষম হোৱা নাই (Woman missing case in Nalbari) ৷
জানিব পৰা মতে, আৰক্ষীয়েও নিৰুদ্দেশ হোৱা মহিলাগৰাকীৰ সন্ধান অব্যাহত ৰাখিছে ৷ ইফালে যিমানে দিন অতিবাহিত হৈছে, সিমানেই পৰিয়ালটোৰ মাজত বাঢ়িছে ভয়-শংকা ৷ উপায়ন্তৰ হৈ ভুক্তভোগী পৰিয়ালটোৱে কাষ চাপিছে সংবাদ মাধ্যমৰ ৷ কোনো লোকে যদি নিৰুদ্দেশ হোৱা মহিলাগৰাকীৰ সম্ভেদ লাভ কৰে, তেন্তে সমীপৰ আৰক্ষী থানাৰ লগতে 86388-32450/ 93650-56764 ম’বাইল নম্বৰত যোগাযোগ কৰিবলৈ অনুৰোধ জনাইছে পৰিয়াল তথা আত্মীয়ই ।
লগতে পঢ়ক : গোৰেশ্বৰৰ পৰা নিৰুদ্দেশ অষ্টম শ্ৰেণীৰ ছাত্ৰী
