কলিয়াবৰ, 18 জানুৱাৰীঃ বিগত ভালেমান দিন ধাৰাবাহিকভাবে কলিয়াবৰত অব্যাহত আছে বনৰীয়া হাতীৰ তাণ্ডৱ । নিশা হ'লেই হাতীৰ সন্ত্ৰাসত শঙ্কিত হৈ পৰে কলিয়াবৰীয়া গঁঞা ৰাইজ। শুকুৰবাৰে নিশা কলিয়াবৰ মহকুমাৰ মাধতাৰি আৰু পোৰাভেটি গাঁৱৰ দুখন ঘৰত উপদ্ৰৱ চলায় এটা বনৰীয়া হাতীয়ে। নিশা প্ৰায় ১২ মান বজাত পোৰাভেটি গাঁৱৰ অকণমান বৰাৰ ঘৰৰ বাৰান্দাৰ লোহাৰ গ্ৰীল ভাঙি ধানৰ বস্তাৰ ধান খোৱাৰ লগতে ধানৰ বস্তা লৈ যায় হাতীটোৱে ।
লগতে পঢ়কঃ শিল্পী দিৱসত জুবিন গাৰ্গৰ হুংকাৰ: ৰাজপাট নিদিয়ে বিজেপিক
আনহাতে, মাধতাৰি গাঁৱৰ গজেন নেওগৰ ঘৰৰ পকী বেৰ ভাঙি বনৰীয়া হাতীটোৱে বস্তাৰ ধান খাই দুটাকৈ ধানৰ বস্তা লৈ যায় । মূলতঃ কৃষিৰ ওপৰত নিৰ্ভৰশীল লোকসকলৰ নিদ্ৰা হৰণ কৰিছে বনৰীয়া হাতীয়ে । কেতিয়াবা যদি হাতীৰ জাক , কোনো সময়ত অকলে আহিও উপদ্ৰৱ চলাই বনৰীয়া হাতীয়ে ৷
কিন্তু ইমানৰ পাছতো সুখ নিদ্ৰাত বন বিভাগ । বন বিভাগ আৰু কলিয়াবৰ মহকুমা প্ৰশাসনৰ যুটীয়া উদ্যোগত সৌৰ শক্তি চালিত "পাৱাৰ ফেঞ্চিং" স্থাপনৰ পাচতো কলিয়াবৰৰ বৃহৎ অঞ্চলটোত বনৰীয়া হাতীৰ উপদ্ৰৱ অব্যাহত আছে। পাৱাৰ ফেঞ্চিং দিয়াৰ পিচত বনৰীয়া হাতী নিয়ন্ত্ৰণৰ ক্ষেত্ৰত বন বিভাগৰ তৎপৰতা বহু পৰিমাণে কমিছে বুলি অভিযোগ কৰিছে স্থানীয় ৰাইজে ।
