চামগুৰি,16 ডিচেম্বৰ : নগাঁৱৰ চামগুৰিলৈ পুনৰ অঞ্চলটোত উভতি আহিছে বন্যহস্তীৰ এটা বৃহৎ জাক । বিগত কিছুদিনৰ পৰা দিনে-নিশাই চামগুৰিৰ বাঘবৰালি, ৰঙাগড়া, ৰঙামাটি, বুঢ়া-বুঢ়ী, চৰণবস্তী, গেন্ধালি, উদমাৰী, কেঁকোৰাচুক আদি বিভিন্ন অঞ্চলত বন্যহস্তীৰ এটা 150 জনীয়া বৃহৎ জাকে চলাই আহিছে উপদ্ৰৱ ।
সোমবাৰে নিশা বন বিভাগৰ লোকে বনৰীয়া হাতীৰ জাকটো কাৰ্বি পাহাৰৰ দিশে খেদি পঠিওৱাৰ চেষ্টা চলাইছিল যদিও পুনৰ অঞ্চলটোলৈ উভতি আহে বন্যহস্তীৰ বৃহৎ জাকটো । বন বিভাগে চলোৱা অভিযান সফল নোহোৱাত পুনৰ মঙলবাৰে নিশাও সংশ্লিষ্ট বিভাগটোৰ অৰ্ধশতাধিক বিষয়া-বনৰক্ষীয়ে স্থানীয় ৰাইজৰ সহযোগত বিয়লিৰ পৰা ব্যাপকৰূপে আৰম্ভ কৰে হাতী খেদাৰ অভিযান । শালনা আঞ্চলিক বন বিষয়াৰ নেতৃত্বত উদমাৰী আৰু চাপানালা খণ্ড বন বিষয়াৰ কাৰ্যালয়ৰ লগতে নগাঁও সদৰ বন কাৰ্যালয়ৰ বিষয়া-বনকৰ্মীসকলে শূণ্যলৈ গুলি চালনা কৰি আৰু ফটকা ফুটাই পুনৰ আৰম্ভ কৰে অভিযান ।
ইফালে স্থানীয় ভুক্তভোগী ৰাইজেও হাতে-হাতে জোৰ-ভোটা লৈ বন বিভাগৰ অভিযানকাৰী দলটোক সহযোগিতা আগবঢ়ায় । অৱশ্যে মঙলবাৰৰ মাজনিশালৈ বন বিভাগে বনৰীয়া হাতীৰ বৃহৎ জাকটো নিৰ্ধাৰিত স্থানলৈ খেদি পঠিয়াবলৈ সক্ষম হয় যদিও খাদ্যৰ সন্ধানত জাকটো যে পুনৰ জনাঞ্চললৈ ঘূৰি নাহিব, তাক কিন্তু নুই কৰিব নোৱাৰি । ইয়াকে লৈ এতিয়া চৰম শংকা আৰু নিৰাপদহীনতাৰ মাজত থাকিবলৈ বাধ্য হৈছে বৃহত্তৰ অঞ্চলটোৰ গঞা ৰাইজ ।
লগতে পঢ়ক : ভাৰতীয় সীমান্ত পথ প্ৰাধিকৰণ ডুমডুমাৰ উদ্যোগত স্বচ্ছতাৰ ৰেলী
