চামগুৰি, 22 আগষ্ট : নগাঁও জিলাৰ চামগুৰিৰ পদুমণিত অব্যাহত আছে বন্যহস্তীৰ উপদ্ৰৱ । শুকুৰবাৰে নিশা প্ৰায় ৮ বজাত পদুমণিত পুনৰ বন্যহস্তীয়ে চলায় উপদ্ৰৱ । গৃহস্থৰ ঘৰৰ চাউল-দাইল খাই বিস্তৰ ক্ষতিসাধন কৰে বন্যহস্তীটোৱে । কথমপি প্ৰাণৰক্ষা পৰে দুই কণমানিসহ এগৰাকী বৃদ্ধাৰ ।
চামগুৰিৰ বিভিন্ন অঞ্চলত বহুদিন ধৰি বন্যহস্তীয়ে উপদ্ৰৱ চলাই আহিছে । শুকুৰবাৰে নিশাও অঞ্চলটোৰ কেইবাটাও বাসগৃহত উপদ্ৰৱ চলাই বন্যহস্তীয়ে ৷ ঘৰৰ দেৱাল, খিৰিকী ভাঙি বন্যহস্তীয়ে কেইবাটাও বাসগৃহৰ বিস্তৰ ক্ষতি কৰাৰ লগতে ভঁৰাল ঘৰ আৰু সা-সম্পত্তিৰো অনিষ্ট সাধন কৰে ৷
শনিবাৰে পুৱা বন বিভাগৰ বিষয়া উপস্থিত হৈ ঘটনাস্থলী পৰিদৰ্শন কৰে ৷ আনহাতে হাতীৰ উপদ্ৰৱত এতিয়া প্ৰায় নিৰাপত্তাহীন জীৱন-যাপন কৰিবলগীয়া হৈছে অঞ্চলবাসীয়ে । চৰকাৰে অঞ্চলটোৰ হাতী-মানুহৰ সংঘাত ৰোধ কৰাৰ বাবে কি ব্যৱস্থা গ্ৰহণ কৰে, সেয়া পৰৱৰ্তী সময়ত লক্ষণীয় হ’ব ।
লগতে পঢ়ক : বাক্সাত বিদ্যুৎস্পৃষ্ট হৈ কৰুণ মৃত্যু দুটাকৈ হাতীৰ
