কলিয়াবৰ,12 মাৰ্চঃ গোলাঘাট জিলাৰ মৰঙীৰ চাৰি কৃষক সন্তানে কাৰাবন্দী কৃষক নেতা অখিল গগৈৰ বিনাচৰ্তে মুক্তিৰ দাবী বিচাৰি পদযাত্ৰা আৰম্ভ কৰিছে গুৱাহাটীলৈ । আৰক্ষীৰ বাধা নেওচি বুধবাৰে নিশা কলিয়াবৰৰ কুঠৰীত উপস্থিত হয় যুৱকৰ দলটো ৷ দলটোৱে বৃহস্পতিবাৰৰ পুৱা কলিয়াবৰৰ মাজেৰে ৩৭নং ৰাষ্ট্ৰীয় ঘাইপথেৰে পদব্ৰজে যাত্ৰা কৰিছে গুৱাহাটী অভিমুখে । চাৰিদিনত ভৰি দিয়া পদযাত্ৰাটোৰ মূল লক্ষ্য অসমৰ জনতাৰ কণ্ঠ অখিল গগৈৰ মুক্তিৰ দাবী ।
অখিল গগৈক বিনাচৰ্তে মুক্তিৰ দাবীত নুমলীগড়ৰ পৰা গুৱাহাটী কেন্দ্ৰীয় কাৰাগাৰলৈ যুৱককেইজনে পদযাত্ৰা আৰম্ভ কৰিছে ৷ পদযাত্ৰাৰ যোগেদি অখিল গগৈক চৰকাৰে বিনাচৰ্তে মুক্তি দিয়াৰ লগতে কা বিৰোধী কাৰাবন্দীক শীঘ্ৰে মুকলি কৰাৰ দাবী জনাব চৰকাৰক ৷ অখিল গগৈক শীঘ্ৰে মুকলি কৰি নিদিলে ভয়াৱহ কাৰ্যসূচী গ্ৰহণ কৰিব যুৱককেইজনে । এই সংগ্ৰামত ৰাইজৰ সহযোগ কামনা কৰিছে চাৰি যুৱকে ৷
