বটদ্ৰৱা, 9 জুলাই: চৰকাৰ আহিল চৰকাৰ গ’ল কিন্তু গুৰুত্ব প্ৰদান নকৰিলে বছৰ বছৰ ধৰি যাতায়তৰ সমস্যাৰে জৰ্জৰিত এই গাওঁখনক । বটদ্ৰৱা সমষ্টিৰ এইটো এটা গুৰুত্বপূৰ্ণ পথ । এই গুৰুত্বপূৰ্ণ পথটো দীৰ্ঘদিন ধৰি শোচনীয় অৱস্থা হৈ থকাৰ বাবে মঙলবাৰে হাতে হাতে কোৰ পাচি লৈ ওলাই আহিল গাঁওখনৰ পুৰুষ মহিলা পথ মেৰামতিৰ বাবে । বটদ্ৰৱা বিধানসভা সমষ্টিৰ অন্তৰ্গত চাবুকধৰা গাঁও পঞ্চায়তৰ গুৰুত্বপূৰ্ণ শান্তিপুৰ আৰু লুঙামুখ পথটোৰ শোচনীয় অৱস্থাৰ দৃশ্য এইয়া । বিধায়িকা আঙুৰলতা ডেকাৰ গৃহ গাঁৱৰ পৰা মাত্ৰ ২.৫ কিলোমিটাৰ ওচৰতে থকা এই পথছোৱাৰ দুৰৱস্থাৰ বাবেই এই অঞ্চললৈ অন্য অঞ্চলৰ লোকে আহিবলৈ মন নকৰে । এই গাঁওখনলৈ নাহে ১০৮ সেৱা । যাৰ বাবে ঠেলাতেই চিকিৎসায়লৈ নিব লগা হয় ৰোগীক । অঞ্চলটোৰ ৰাইজে বিয়া-সকাম আদি অনুষ্ঠিত কৰিলে নিজৰ ভিতৰতে সীমাবদ্ধ ৰাখিব লগীয়া হয় । প্ৰায় ২.৫ কিলোমিটাৰ দৈৰ্ঘ্যৰ পথটোৰ ১০০ মিটাৰ মান নিৰ্মাণ কৰা হ'ল যদিও অন্য অংশ নিৰ্মাণ নহ’ল ।
তাৎপৰ্যপূৰ্ণ যে চাবুকধৰা গাঁও পঞ্চায়ত আৰু চাবুকধৰা জিলা পৰিষদ কংগ্ৰেছৰ দখলত যদিও পথটো থকা ৱাৰ্ডটো বিজেপিৰ দখলত । পথটোৰ দুৰৱস্থাৰ বিষয়ে বিভাগীয় কৰ্তৃপক্ষক বহুবাৰ আবেদন-নিবেদন কৰিও ৰাইজে কোনো সুফল লাভ নকৰাত মঙলবাৰে স্থানীয় ৰাইজে নিজেই পথটো মেৰামতি কৰিবলৈ ওলাই আহে । স্থানীয় মহিলা সকলে দিন হাজিৰা কৰি লাভ কৰা ধনৰ পৰা প্ৰতিগৰাকীৰ বিপৰীতে পাঁচ-দহ টকা সংগ্ৰহ কৰি পথটো মেৰামতি কৰে । স্থানীয় ৰাইজৰ অভিযোগ নিৰ্বাচনৰ সময়ত ভোট বিচাৰি জনপ্ৰতিনিধি সকল তেওঁলোকৰ অঞ্চললৈ আহে যদিও নিৰ্বাচনত বিজয়ী হোৱাৰ পিচতে তেওঁলোকলৈ পিঠি দিয়ে । বটদ্ৰৱা বিধানসভা সমষ্টিৰ বিধায়িকা আঙুৰলতা ডেকাইও তেওঁলোকৰ অঞ্চলটোৰ যাতায়তৰ শোচনীয় অৱস্থাৰ খবৰ লোৱা নাই বুলিও ক্ষোভ উজাৰে অঞ্চলবাসীয়ে ৷
