নগাঁও, 28 আগষ্ট : দলীয় অন্তঃকন্দল, বিসম্বাদত এতিয়া জৰ্জৰিত ৰাজ্যৰ প্ৰধান বিৰোধী দল কংগ্ৰেছ ৷ শুকুৰবাৰে নগাঁৱত পুনৰ স্পষ্ট হ’ল কংগ্ৰেছৰ ভিতৰচ'ৰাত অব্যাহত থকা দলীয় বিসম্বাদ ৷ জিলাখনত পৃথকে পৃথকে কংগ্ৰেছে ৰূপায়ন কৰিলে ছাত্ৰ সত্যাগ্ৰহ কাৰ্যসূচী ৷ এন এছ ইউ আইৰ উদ্যোগত গ্ৰহণ কৰা এটা কাৰ্যসূচীত অংশগ্ৰহণ প্ৰাক্তন মন্ত্ৰী ৰকিবুল হুছেইনৰ আৰু আনটো কাৰ্যসূচীত অংশগ্ৰহণ যুৱ কংগ্ৰেছৰ ৰাজ্যিক সম্পাদক মৃণাল হাজৰিকাৰ ৷ চৰকাৰৰ বিৰুদ্ধে গ্ৰহণ কৰা প্ৰতিবাদী কাৰ্যসূচীতো একগোট হ’ব নোৱাৰিলে এন এছ ইউ আইৰ দুই গোট ৷ অসম প্ৰদেশ কংগ্ৰেছৰ সভাপতি ৰিপুন বৰা আৰু প্ৰাক্তন মন্ত্ৰী ৰকিবুল হুছেইনৰ বিৰুদ্ধে বৃহস্পতিবাৰে হাজো ৰাজীৱ ভৱনত লংকাকাণ্ড সংঘটিত হৈ যোৱাৰ পিচত শুক্ৰবাৰে নগাঁৱতো স্পষ্ট হ'ল কংগ্ৰেছৰ বিসম্বাদ ।
উল্লেখ্য যে, শুক্ৰবাৰে ৰাজ্যজুৰি JEE আৰু NEET ৰ পৰীক্ষা বাতিলৰ দাবীত বিৰোধী দল কংগ্ৰেছে গ্ৰহণ কৰে ছাত্ৰ সত্যাগ্ৰহ কাৰ্যসূচী । নগাঁৱতো সাব্যস্ত কৰা হয় এই প্ৰতিবাদ । কিন্তু একেটা বিষয়ত একেটা দলেই পৃথকে পৃথকে সাব্যস্ত কৰিলে প্ৰতিবাদ ৷ এই কথাই যেন পুনৰ বাৰ প্ৰমাণ কৰিছে কংগ্ৰেছৰ ভিতৰ চ’ৰাত অব্যাহত থকা দলীয় নেতৃত্বৰ বিসম্বাদৰ কথা ৷ প্ৰতিবাদৰ সময়ছোৱাত নগাঁৱৰ দুটা ভিন্ন ঠাইত এন এছ ইউ আইৰ উদ্যোগত অনুষ্ঠিত হল দুটা ফৈদৰ প্ৰতিবাদী কাৰ্যসূচী ৷ এফালে নগাঁও জিলা উপায়ুক্ত কাৰ্যালয়ৰ সমীপত নগাঁও জিলা কংগ্ৰেছ আৰু এন এছ ইউ আইৰ উদ্যোগত অনুষ্ঠিত হয় ছাত্ৰ সত্যাগ্ৰহ কাৰ্যসূচী ৷ য'ত অংশগ্ৰহণ প্ৰাক্তন মন্ত্ৰী ৰকিবুল হুছেইনে ৷ প্ৰতিবাদী কাৰ্যসূচীত ভাগ লৈ কৰ'ণা সৃষ্ট পৰিবেশৰ মাজতে পৰীক্ষা অনুষ্ঠিত কৰি ছাত্ৰ ছাত্ৰীৰ জীৱনক লৈ চৰকাৰে হেতালি খেলিছে বুলি মন্তব্য কৰে প্ৰাক্তন মন্ত্ৰী ৰকিবুল হুছেইনে ৷
আনহাতে ৰকিবুল হুছেইনে অংশগ্ৰহণ কৰা প্ৰতিবাদী কাৰ্যসূচীৰ নাতি দূৰৈৰ নগাওঁ মহাবিদ্যালয় পইণ্টত একেটা দাবীতে ছাত্ৰ সত্যাগ্ৰহ কাৰ্যসূচী ৰূপায়ন কৰে এন এছ ইউ আইৰ আন এটা গোটে ৷ এই প্ৰতিবাদী কাৰ্যসূচীত অংশগ্ৰহণ অসম প্ৰদেশ যুৱ কংগ্ৰেছৰ সম্পাদক মৃণাল হাজৰিকাই ৷ ছাত্ৰ সত্যাগ্ৰহ কাৰ্যসূচীৰ জৰিয়তে JEE আৰু NEET ৰ পৰীক্ষা বাতিলৰ দাবী উত্থাপন কৰে নগাঁও জিলা এন এছ ইউ আইৰ সম্পাদক পল্লৱজ্যোতি নাথে ৷ একেটা দাবীৰে একেখন জিলাতে কংগ্ৰেছৰ দুটা ফৈদে এনেদৰে প্ৰতিবাদ সাব্যস্ত কৰা ঘটনাই যেন পুনৰ বাৰ স্পষ্ট কৰিছে নগাঁও কংগ্ৰেছৰ বিসম্বাদ ৷
লগতে পঢ়ক : ৰাজ্যৰ ভিন্ন প্ৰান্তত NSUI ৰ উদ্যোগত ছাত্ৰ সত্যাগ্ৰহ কাৰ্যসূচী
