কলিয়াবৰ, 01 জুন: নতুন দিল্লীৰ ৰাষ্ট্ৰীয় নাট্য বিদ্যালয়ৰ স্নাতক পৰাগ শৰ্মাৰ পাচতেই নাট্য কলা বিষয়ত উচ্চ শিক্ষাৰ সুবিধা লাভ কৰিছে কলিয়াবৰৰ কুকিল গোস্বামীয়ে ৷ কুকিল গোস্বামী,কলিয়াবৰৰ উলুৱনীৰ শ্ৰীশ্ৰী গোৱিন্দ এলেঙী সত্ৰৰ সত্ৰীয়া সংস্কৃতিৰ সাধক প্ৰয়াত যোগেন গোস্বামীৰ পুত্ৰ ৷
নাট্য শিক্ষাৰ উচ্চ শিক্ষানুষ্ঠানৰ কথা মনলৈ আহিলে নতুন দিল্লীৰ ৰাষ্ট্ৰীয় নাট্য বিদ্যালয়ৰ কথা মনলৈ আহে ৷ য'ত আছে নাট্য শিক্ষাৰ স্নাতক পাঠ্যক্ৰম ৷ কিন্তু বৰ্তমান ভাৰতীয় নাট্য কলাক এক বিদ্যায়তনিক দিশত আগবঢ়াই নিয়াৰ ক্ষেত্ৰত দেশৰ বিভিন্ন বিশ্ববিদ্যালয়ত নাট্য কলাৰ স্নাতক তথা স্নাতকোত্তৰ পাঠ্যক্ৰম মুকলি কৰা হৈছে। পিতৃৰ হাতত ধৰি সত্ৰীয় সংস্কৃতিৰ পথাৰত খোজ পেলোৱা কুকিল এতিয়া মুম্বাই বিশ্ববিদ্যালয়ৰ অন্তৰ্গত একাডেমী অৱ থিয়েটাৰ আৰ্টচৰ নাট্য কলাৰ স্নাতকোত্তৰ পাঠ্যক্ৰমৰ ছাত্ৰ ৷ সত্ৰীয়া নৃত্যৰ লগতে দেশৰ বিভিন্ন লোক-নৃত্যৰ শৈলীৰ অধ্যয়নৰে এক সুকীযা ধাৰা সৃষ্টিৰ চেষ্টা চলাই আহিছে কুকিলে ৷ ভাওনা, বৰগীত,খোলত বাদনত পাৰ্গত কুকিল গোস্বামী আধুনিক নাট্য কলাৰো ছাত্ৰ ৷ ইতিমধ্যে তেওঁ অসমৰ বিভিন্ন স্থানত নাট কৰ্মশালাত অংশগ্ৰহণৰ অভিজ্ঞতা আৰু নাট প্ৰযোজনাৰ লগত জড়িত থাকি চিকিমৰ গেংটকত ৰাষ্ট্ৰীয় নাট্য বিদ্যালয়ৰ চিকিম পৰিসৰত এবছৰীয়া নাট্য শিক্ষাৰ পাঠ্যক্ৰম সম্পূৰ্ণ কৰিছে ৷ সেই অভিজ্ঞতাৰে পৰিপূষ্ট কুকিলে ৰাজস্থানৰ এক নাট প্ৰকল্পত সত্ৰীয়া নৃত্য শৈলী প্ৰয়োগেৰে প্ৰশংসিত হৈছে ৷ ই টিভি ভাৰতৰ আগত তেওঁ ক'লে মনৰ কথা, নাটকৰ কথা ৷
