বঢ়মপুৰ, ২১ছেপ্টেম্বৰ: ধোঁৱাচাঙত অসমৰ শিক্ষাবিভাগ ৷ শিক্ষা বিভাগকো কেৰেপ নকৰে ৰহা সমষ্টিৰ এজন শিক্ষকে ৷ এবছৰ ধৰি বিদ্যালয়ত অনুপস্থিত শিক্ষকগৰাকী(Teacher absent from school for a year) ৷ ঘৰত বহিয়ে দৰমহা ভোগ কৰি থকাৰ অভিযোগ শিক্ষকগৰাকীৰ বিৰুদ্ধে ৷ শিক্ষা বিভাগৰ বৰমূৰীয়াক মেনেজ কৰাৰো অভিযোগ উত্থাপিত হৈছে শিক্ষকজনৰ বিৰুদ্ধে ৷ ছাত্ৰ-ছাত্ৰীক শিক্ষাদানত গাফিলতি কৰা আদি বিভিন্ন অভিযোগত অভিযুক্ত কৰি শিক্ষকগৰাকীৰ বিৰুদ্ধে পৰিচালনা সমিতিয়ে বিগত সময়ত শিক্ষা বিষয়াৰ ওচৰত লিখিত অভিযোগ দিছিল ৷
উত্থাপিত অভিযোগ অনুসৰি, ৰহা সমষ্টিৰ অন্তৰ্গত কঠিয়াতলী শিক্ষা খণ্ডৰ বকুলগুৰি মোক্তাৱ বিদ্যালয়ৰ সহকাৰী শিক্ষক (Teacher of Bakulguri Moktab School absent) অমৃত জ্যোতি বৰা দীৰ্ঘদিন ধৰি বিদ্যালয়ত অনুপস্থিত হৈ আছে ৷ ২০১৫ বৰ্ষত বিদ্যালয়ত যোগদান কৰা শিক্ষকগৰাকীয়ে ২০২১ বৰ্ষৰ অক্টোবৰৰ পৰা বৰ্তমানলৈকে উপস্থিত নথকাৰ গুৰুতৰ অভিযোগ উত্থাপন কৰিছে বিদ্যালয় পৰিচালনা সমিতিৰ লগতে আমছুৱে (AAMSU of Raha) ।
বিদ্যালয় পৰিচালনা সমিতিয়ে শিক্ষকগৰাকীক ফোনত যোগাযোগ কৰাৰ পিছতো নানান অজুহাত দেখুৱাই নিজৰ কৰ্তব্যৰ পৰা আঁতৰি থকাত বিমোৰত পৰিছে বিদ্যালয় কৰ্তৃপক্ষ । এই সম্পৰ্কত বিভাগীয় কৰ্তৃপক্ষক অৱগত কৰিছে যদিও সুফল নোপোৱাত চিন্তিত হৈ পৰিছে অভিভাৱকসকল । ৭০ গৰাকী ছাত্ৰ -ছাত্ৰী থকা বিদ্যালয়খনত শিক্ষকৰ অভাৱত পাঠদানত বহু অসুবিধা হোৱাৰ উপৰিও বিগত বৰ্ষৰ গুনোৎসৱত এ গ্ৰেড পোৱা বিদ্যালয়খনে ২০২২ বৰ্ষৰ গুনোৎসৱত নিম্নগামী হৈ বি গ্ৰেড লাভ কৰাত ক্ষুব্ধ হৈ পৰিছে বিদ্যালয়ৰ পৰিচালনা সমিতি । এই ক্ষেত্ৰত বিভাগীয় কৰ্তৃপক্ষই দীৰ্ঘদিন ধৰি অনুপস্থিত হৈ থকা শিক্ষক অমৃতজ্যোতি বৰাৰ বিৰুদ্ধে বিহিত ব্যৱস্থা গ্ৰহণ কৰিবলৈ শিক্ষামন্ত্ৰী ডাঃৰণোজ পেগুক (Education Minister Dr Ranoj Pegu) অনুৰোধ জনাইছে ।
