নগাঁও,4 ফেব্ৰুৱাৰী: ৰাজ্যত পুনৰ সংঘটিত হৈছে নাৰীজনিত অপৰাধ ৷ এইবাৰ ঘটনা সংঘটিত হোৱা স্থান নগাঁও জিলাৰ বটদ্ৰৱাৰ লালুং গাঁও ৷ ঘটনাৰ বিৱৰণী অনুসৰি, লালুং গাঁৱৰ এগৰাকী কিশোৰীৰ সৈতে এজন আত্মীয়ই বিভিন্ন প্ৰলোভনেৰে শাৰিৰীক সম্পৰ্ক স্থাপন কৰে ৷ ফলত কিশোৰীগৰাকী অন্তসত্ত্বা হয় ৷ এই ঘটনা পোহৰলৈ অহাত লোকচক্ষুৰ পৰা হাত সাৰিবলৈ মৰিগাঁৱৰ এজন স্বয়ম্ভূ চিকিৎসকে কিশোৰীগৰাকীৰ গৰ্ভপাত কৰোৱাই যদিও মৃত্যুমুখত পৰে নৱম শ্ৰেণীত অধ্যয়নৰত কিশোৰীগৰাকী ৷ বিগত 23 জানুৱাৰীত কিশোৰীগৰাকীক জুৰীয়াৰ দগাঁৱৰ এক কবৰস্থানত গোপনে কবৰস্থ কৰা হয় ৷ পৰৱৰ্তী সময়ত উক্ত অচিনাক্ত কবৰ প্ৰত্যক্ষ কৰি স্থানীয় লোকৰ সন্দেহ ওপজাত খবৰ দিয়ে আৰক্ষীক ৷
আনহাতে, এই খবৰ লাভ কৰি বৃহস্পতিবাৰে ঘটনাস্থলীত উপস্থিত হয় আৰক্ষী ৷ আৰক্ষীয়ে দণ্ডাধীশৰ উপস্থিতিত কিশোৰীগৰাকীৰ মৃতদেহটো উদ্ধাৰ কৰি মৰণোত্তৰ পৰীক্ষাৰ ব্যৱস্থা কৰে ৷ ঘটনা সন্দৰ্ভত জড়িত থকা দোষীক তদন্তৰ মাজেৰে চিনাক্ত কৰি শাস্তি প্ৰদান কৰিবলৈ আৰক্ষীক আহ্বান জনাইছে স্থানীয় ৰাইজে ৷ উল্লেখ্য যে, বটদ্ৰৱাৰ লালুংগাঁৱতে 2018 চনৰ 23 মাৰ্চত এগৰাকী নাবালিকাক ধৰ্ষণ কৰি হত্যা কৰাৰ দৰে জঘন্য ঘটনা সংঘটিত হৈছিল ৷
