নগাঁও, 24 জুলাই : ৰাজ্যত এতিয়া গোপনে সক্ৰিয় হৈ পৰিছে নাৰী দেহ ব্যৱসায়ী চক্ৰ (women trafficking) । সংস্থাপন দিয়াৰ নামত অসমৰ মহিলাক বিক্ৰী কৰে বহিঃ ৰাজ্যত । সম্প্ৰতি পোহৰলৈ আহিছে তেনে এক ভয়ংকৰ ঘটনা । নগাঁৱত (NAGAON) শনিবাৰে জালত পৰিছে নাৰী দেহ ব্যৱসায়ীৰ বৃহৎ চক্ৰ । নাৰী দেহৰ ব্যৱসায়ত নামিছে একাংশ মহিলা । মহিলাৰ নেতৃত্বতেই নাৰী দেহ ব্যৱসায় চলি আছে অসমত।
উল্লেখযোগ্য যে, বহিঃ ৰাজ্যত সংস্থাপন দিয়াৰ দিয়াৰ প্ৰলোভনেৰে মহিলাক বিক্ৰীৰ চেষ্টা কৰাৰ ভয়ংকৰ তথ্য পোহৰলৈ আহিছে । শনিবাৰে নগাঁৱৰ মৰঙিয়ালৰ এটা ভাড়াঘৰৰ পৰা স্থানীয় গাঁওৰক্ষী বাহিনীৰ সহযোগত উদ্ধাৰ হয় এগৰাকী মহিলা । লগতে দুগৰাকীকৈ সৰবৰাহকাৰীকো আটক কৰিবলৈ সক্ষম হয় নগাঁও আৰক্ষীৰ (NAGAON POLICE) ৰাইডাৰ পাৰ্টীয়ে । মৰিগাঁও জিলাৰ মায়ঙৰ এগৰাকী মহিলাক কামৰ প্ৰলোভনেৰে কেৰালালৈ লৈ যোৱাৰ কথা কৈ মহিলাগৰাকীক বিক্ৰী কৰাৰ প্ৰস্তুতি চলাই থাকোতে সন্দেহ হয় মহিলাগৰাকীৰ ।
মহিলাগৰাকীয়ে স্থানীয় গাঁওৰক্ষী বাহিনীক বিষয়টো অৱগত কৰাৰ পিছত গাঁওৰক্ষী বাহিনীয়ে খবৰ দিয়ে ৰাইডাৰ পাৰ্টীক । সেই মতে শনিবাৰে ৰাইডাৰ পাৰ্টীয়ে মহিলাগৰাকীক উদ্ধাৰ কৰাৰ লগতে সৰবৰাহৰ চেষ্টা কৰা মাৰ্জিনা বেগম আৰু মাহমুদা বেগম নামৰ মহিলা দুগৰাকীক আটক কৰিবলৈ সক্ষম হয় । সম্প্ৰতি আৰক্ষীয়ে অধিক তথ্যৰ বাবে জেৰা অব্যাহত ৰাখিছে ধৃত মহিলা দুগৰাকীক ।
এনেদৰেই এতিয়া ৰাজ্যৰ আন প্ৰান্ততো অব্যাহত আছে নেকি নাৰী দেহ ব্যৱসায়ী চক্ৰ ৷ ড্ৰাগছকে ধৰি অন্যান্য অপৰাধৰ বিৰুদ্ধে সক্ৰিয় হৈ থকা অসম আৰক্ষীয়ে নাৰী দেহ ব্যৱসায়ী চক্ৰ উৎখাত কৰিবলৈ সক্ষম হ’ব নে ৷ সেয়া সময়ত হে লক্ষণীয় হ‘ব ।
লগতে পঢ়ক: শীঘ্ৰেই উত্তৰ গুৱাহাটীৰ পৰ্যটনৰ ক্ষেত্ৰখনত সংযোজিত হ'ব এক দুঃসাহসিক ক্ৰীড়া
