কলিয়াবৰ, 30 ডিচেম্বৰ : কাজিৰঙা ৰাষ্ট্ৰীয় উদ্যানৰ বুঢ়াপাহাৰ বনাঞ্চলৰ অন্তৰ্গত দেওচুৰ চাঙত বুধবাৰে ঘৰচীয়া হাতীয়ে অৱৰোধ কৰিলে যান-বাহন।
কাজিৰঙা ৰাষ্ট্ৰীয় উদ্যানৰ বন শিবিৰত শিকলিৰে বান্ধি থোৱা এটা ঘৰচীয়া হাতী বান্ধি থোৱা গছডালকেই উভালি ৰাষ্ট্ৰীয় উদ্যানৰ বাহিৰলৈ ওলাই আহি ৰাজপথত অৱস্থান গ্ৰহণ কৰে হাতীটোৱে । ভোকাতুৰ হৈ গজৰাজে বান্ধি থোৱা গছডালকে উভালি ৰাজপথত অৱস্থান কৰিছে বুলি সন্দেহ কৰিছে ৰাইজে ।
ভোকাতুৰ হাতীটোৱে ৰাজপথৰ দাঁতিত খাদ্য গ্ৰহণ কৰি থকাৰ সময়ত বহু সময় ধৰি শিকলিত লাগি থকা গছডাল ৩৭নং ৰাষ্ট্ৰীয় ঘাইপথত পঠালি হৈ পৰি ৰয়। ফলত সাময়িকভাৱে পথত যান-বাহন চলাচলত ব্যাঘাত ঘটে। কিছুসময় অৱস্থান কৰাৰ পাছতে হাতীটো কাৰ্বি আংলঙৰ দিশে গতি কৰাৰ পাছতে মুকলি হয় পথচোৱা । গজৰাজৰ এই আচৰণে ৰাষ্ট্ৰীয় উদ্যান কৰ্তৃপক্ষৰ হেমাহিৰ ছবি এখন দাঙি ধৰা বুলিও সচেতন মহলে মত প্ৰকাশ কৰিছে ।
লগতে পঢ়ক: সত্ৰীয়া সংস্কৃতিৰ সমান্তৰালকৈ চৰ্চিত মাজুলীৰ আন এক শিল্প
