নগাঁও, 23 আগষ্ট : কলিয়াবৰৰ বুঢ়াপাহাৰৰ সমীপৰ ৰাষ্ট্ৰীয় ঘাইপথৰ দেওচুৰ দলঙত বৃহস্পতিবাৰে নিশা প্ৰায় দহ বজাত সংঘটিত হয় এক দুৰ্ঘটনা । শিলিগুৰিৰ পৰা ডিব্ৰুগড়লৈ মাৰুতি গাড়ী কঢ়িওৱা এন এল 01 এন 1561 নম্বৰৰ এখন বাহন দেওচুৰৰ দলঙত নিয়ন্ত্ৰণ হৰুৱাই ৰেলিং ভাঙি বাগৰি পৰে দ-খাৱৈত । দুৰ্ঘটনাত গাড়ীখনৰ চালকসহ এজন সহকাৰী গুৰুতৰভাবে আঘাতপ্ৰাপ্ত হয় ।
বুঢ়াপাহাৰত দলঙৰ ৰেলিং ভাগি দ-খাৱৈত গাড়ী
জখলাবন্ধা আৰক্ষীয়ে ততাতৈয়াকৈ চালক আৰু সহকাৰীজনক ঘটনাস্থলীৰ পৰা উদ্ধাৰ কৰি জখলাবন্ধাৰ চিকিৎসালয়ত ভৰ্তি কৰে । প্ৰাথমিক চিকিৎসাৰ অন্তত উন্নত চিকিৎসাৰ বাবে গুৰুতৰভাবে আহত হোৱা বাহনখনৰ চালক সতীশ যাদৱক (37) তেজপুৰ চিকিৎসা মহাবিদ্যালয়লৈ প্ৰেৰণ কৰে । আনহাতে সহকাৰী উপেন্দ্ৰ যাদৱ (32) বৰ্তমান বিপদমুক্ত বুলি জানিব পৰা হৈছে । আনহাতে দুৰ্ঘটনাগ্ৰস্ত বাহনখন শুকুৰবাৰে পুৱাহে উদ্ধাৰ কৰিব পৰা যাব বুলি আৰক্ষীয়ে জানিবলৈ দিয়ে ৷
