নগাঁও,19 এপ্ৰিল: কলিয়াবৰৰ জখলাবন্ধাৰ ৩৭ নং ৰাষ্ট্ৰীয় ঘাইপথত সংঘটিত হৈছে এক ভয়ংকৰ পথ দুৰ্ঘটনা ৷ এখন অচিনাক্ত বাহনে খুন্দিয়াই থৈ যোৱাৰ ফলতে নিহত হয় বামুনীৰ বাবলু ৰবি দাস নামৰ এজন লোক ৷
প্ৰাপ্ত তথ্য অনুসৰি,জখলাবন্ধাৰ পৰা এএচ০২এবি ৬৯৭৫ নম্বৰৰ এখন গ্লেমাৰ মটৰ চাইকেলেৰে বাবলু ৰবি দাসে বামুনীৰ নিজ ঘৰলৈ গৈ থকা সময়তে এই দুৰ্ঘটনাটো সংঘটিত হয় । বাবলু ৰবি দাসৰ বাহনখনত পিচপিনৰ পৰা অচিনাক্ত বাহনখনে প্ৰচণ্ড জোঁৰেৰে খুন্দা মাৰে আৰু ঘটনা সংঘটিত হোৱাৰ পাচতে ঘটনাস্থলীৰ পৰা পলায়ন কৰে বাহনখনে ৷ আৰক্ষীয়ে ঘটনাস্থলীত উপস্থিত হৈ যুৱক জনক চিকিৎসাৰ বাবে তেজপুৰলৈ প্ৰেৰণ কৰে যদিও যাত্ৰা পথতে মৃত্যু হয় বাবলু ৰবি দাসৰ । বৰ্তমান দুৰ্ঘটনা সংঘটিত কৰি পলায়ন কৰা বাহনখনৰ সন্ধানত আৰক্ষীয়ে অব্যাহত ৰাখিছে তদন্ত ৷
অন্য এক খবৰৰ বাবে: কৰিমগঞ্জত হাত-মুখ বন্ধা অৱস্থাত উদ্ধাৰ দুই যুৱক
