কলিয়াবৰ, 24 অক্টোবৰ : কলিয়াবৰৰ লোমহৰ্ষক নাবালিকা হত্যাকাণ্ড(Minor Girl Murder)ৰ বুজ ল’বলৈ শনিবাৰে ঘটনাস্থলীত উপস্থিত হয় অসম ৰাজ্যিক শিশু অধিকাৰ সুৰক্ষা আয়োগ(Assam State Commission for Protection of Child Rights)ৰ তিনিজনীয়া এটা দল ৷ ঘটনাস্থলীত স্থানীয় ৰাইজ আৰু আৰক্ষী-প্ৰশাসনৰ সৈতে এক আলোচনাত মিলিত হয় দলটো ৷
নাবালিকাগৰাকীৰ বাসগৃহত উপস্থিত হৈ দলটোৱে ঘটনাৰ বুজ লয় ৷ লগতে হত্যাকাণ্ডৰ সৈতে জড়িত অভিযুক্ত কিশোৰৰ ঘৰতো উপস্থিত হয় দলটো ৷ নাবালিকাগৰাকীৰ পৰিয়ালে যাতে ভৱিষ্যতে পুনৰ এনেধৰণৰ জঘন্য কাণ্ডৰ সন্মুখীন হ’বলগীয়া নহয়, তাক লৈ আলোচনাত বহে শিশু অধিকাৰ সুৰক্ষা আয়োগৰ তিনিজনীয়া দলটোৱে ৷
ইয়াৰ লগতে অঞ্চলটোৰ শিশুসকলৰ সুৰক্ষাৰ ক্ষেত্ৰত বহুকেইটা পৰিকল্পনা গ্ৰহণ কৰিব বুলি আয়োগৰ প্ৰতিনিধিয়ে জানিবলৈ দিয়ে ৷ অঞ্চলটোৰ শিশুসকলক সুস্থ পৰিৱেশত ৰখাৰ বাবে ইতিমধ্যে জিলা প্ৰশাসনৰ সৈতে আলোচনা কৰিছে ৰাজ্যিক শিশু অধিকাৰ সুৰক্ষা আয়োগৰ উপস্থিত প্ৰতিনিধিয়ে ৷
আনহাতে, শনিবাৰৰ দিনটোত ঘটনা সংঘটিত হোৱা অঞ্চলটোৰ সামাজিক, শৈক্ষিক পৰিৱেশ উত্তৰণৰে শিশু আৰু নাৰীৰ সুৰক্ষাৰ বাবে এক সজাগতামূলক শোভাযাত্ৰা বাহিৰ কৰে কলিয়াবৰ সংহত শিশু উন্নয়ন প্ৰকল্পই । শোভাযাত্ৰাৰ জৰিয়তে সন্তানৰ সু-শিক্ষাৰ ক্ষেত্ৰত চকু দিবলৈ অঞ্চলটোৰ মাতৃসকলক আহ্বান জনায় সংহত শিশু উন্নয়ন প্ৰকল্পৰ বিষয়াসকলে ৷
উল্লেখ্য যে, কাতি বিহুৰ দিনাই কলিয়াবৰৰ বালিবাটৰ নিজৰিস্থিত বজৰংবলী শিলভঙা উদ্যোগত সংঘটিত হৈছিল এগৰাকী ছবছৰীয়া নাবালিকা হত্যাকাণ্ড ৷ তিনি কিশোৰৰ জিঘাংসাৰ বলি হৈছিল নাবালিকাগৰাকী ৷ ম’বাইলত অশ্লীল ভিডিঅ’ চাবলৈ তিনি কিশোৰে জোৰ কৰিছিল নাবালিকাগৰাকীক ৷ কিন্তু সেই ভিডিঅ’ চাবলৈ নাবালিকাগৰাকী অমান্তি হোৱাত প্ৰথমে জোৰ-জবৰদস্তি কিশোৰ তিনিটাই ৷
অৱশেষত এই লোমহৰ্ষক ঘটনাটো সংঘটিত কৰে তিনি কিশোৰে ৷ শিলেৰে থেতালি থেতালি নাবালিকাগৰাকীক হত্যা কৰে কিশোৰ তিনিটাই ৷ হত্যাকাৰী কিশোৰ তিনিটাৰ বয়স 5 ৰ পৰা 11 বছৰৰ ভিতৰত ৷ অতি কম বয়সতে শিশুৰ হাতত অভিভাৱকসকলে ম’বাইল ফোন তুলি দিয়াৰ বাবেই এই ঘটনা সংঘটিত হোৱা বুলি সচেতন মহলৰ মাজত বিষয়টো চৰ্চিত হৈ পৰিছে ৷
লগতে পঢ়ক : হত্যাকাৰীৰ ৰূপ ল’লে কিশোৰে; কলিয়াবৰ কাণ্ডই কঁপাইছে ৰাজ্য
