ধিং, 12 আগষ্ট : প্ৰায়ে বিতৰ্কৰ আৱৰ্তত থাকে নগাঁও জিলাৰ ধিং সমষ্টিৰ এআইইউডিএফৰ বিধায়ক আমিনুল ইছলাম ৷ বিগত কেইদিন ধৰি শিৱসাগৰৰ বিধায়ক অখিল গগৈৰ বিৰুদ্ধে এক বিস্ফোৰক অভিযোগ তুলি আজিও বিতৰ্ক তথা চৰ্চাৰ বিষয় হৈ আছে ধিঙৰ বিধায়কগৰাকী ৷ অভিযোগটো আছিল 10 কোটি টকীয়া ৷
বিধায়ক গৰাকীৰ এই গুৰুতৰ অভিযোগটো এতিয়াও সহজভাৱে ল'ব পৰা নাই অখিল গগৈৰ লগতে নৱগঠিত ৰাইজৰ দলে ৷ সমান্তৰালভাৱে এই অভিযোগৰ বাবে নিজ সমষ্টিবাসীৰে সমালোচনাৰ সন্মুখীন হ'বলগীয়া হৈছে বিধায়ক আমিনুল ইছলাম ৷ এক কথা ক'বলৈ গ’লে আমিনুল ইছলামৰ বিৰুদ্ধে ক্ষোভত ফাটি পৰিছে ধিংবাসী ৷
লগতে পঢ়ক: গাঁওৰক্ষীৰ সৈতে ফুৰিবলৈ গৈ অন্তঃসত্বা হ’ল কিশোৰী
শেহতীয়াকৈ আমিনুল ইছলামৰ বিস্ফোৰক অভিযোগৰ বিৰুদ্ধে সমষ্টিবাসীয়ে বৃহস্পতিবাৰে মৈমাবাৰীত সাব্যস্ত কৰে উত্তাল প্ৰতিবাদ ৷ ধিং সমষ্টিৰ ৰাইজৰ দলৰ উদ্যোগত ৰূপায়ন কৰা হয় এই প্ৰতিবাদী কাৰ্যসূচী ৷ প্ৰতিবাদী কাৰ্যসূচীত শতাধিক ৰাইজৰ দলৰ কৰ্মীৰ লগতে সাধাৰণ লোকে অংশ গ্ৰহণ কৰে ৷
ৰাইজৰ দলৰ প্ৰতিবাদকাৰীয়ে হাতে হাতে প্লে'কাৰ্ড লৈ বিধায়ক আমিনুল ইছলামে ক্ষমা নুখুজিলে সমষ্টিত প্ৰৱেশ নিষিদ্ধ কৰাৰ হুংকাৰ প্ৰদান কৰে ৷ ইয়াৰ লগতে বিধায়ক আমিনুল ইছলাম মুৰ্দাবাদ, ধৰ্মীয় ৰাজনীতি বন্ধ কৰক, আমিনুল গ'বেক, অখিল গগৈ জিন্দাবাদ আদি শ্লোগানেৰে ৰাজপথ উত্তাল কৰে ৰাইজৰ দলৰ প্ৰতিবাদকাৰী সকলে ৷
প্ৰতিবাদৰ সময়ত মৈৰাবাৰী বজাৰৰ ব্যৱসায়িকে ধৰি কুৰিৰো অধিক সাধাৰণ লোকে ৰাইজৰ দলৰ এই প্ৰতিবাদী কাৰ্যসূচীক মুকলিভাবে সমৰ্থন জনোৱা পৰিলক্ষিত হয় ।
