চামগুৰি,1 মাৰ্চ: পুৰণিগুদামৰ কাষৰিগাঁৱত দেওবাৰে নিশা সংঘটিত হয় এক পথ দুৰ্ঘটনা ৷ নগাঁও অভিমুখী অহা মহিন্দ্ৰা মাৰাঞ্জো আৰু দ্ৰুতবেগী ডাম্পাৰৰ মাজত মুখামুখি সংঘৰ্ষৰ ফলত এই দুৰ্ঘটনা সংঘটিত হয় ৷ প্ৰায় এঘণ্টা ধৰি দুৰ্ঘটনাগ্ৰস্ত মাৰাঞ্জোখনত আৱদ্ধ হৈ থাকে এগৰাকী বৃদ্ধাসহ চালক ৷
স্থানীয় ৰাইজে কুঠাৰেৰে বাহনখন কাটি অৱশেষত উদ্ধাৰ কৰিবলৈ সক্ষম হয় গুৰুতৰভাৱে আহত দুয়োজন ব্যক্তিক । মাৰাঞ্জোখনত অহা আন আহত তিনিজন লোককো সংকটজনক অৱস্থাত নগাঁৱলৈ প্ৰেৰণ কৰা হয় । দুৰ্ঘটনাটো সংঘটিত কৰি ঘটনাস্থলীৰ পৰা পলায়ন কৰে ডাম্পাৰখনৰ চালক-হেণ্ডিমেন ।
