নগাঁও, 12 আগষ্ট : নগাঁৱত এইবাৰ ই-ৰিক্সা চালকৰ ৰূপত ড্ৰাগছ সৰবৰাহকাৰী ৷ নিষিদ্ধ ড্ৰাগছৰ কণ্টেইনাৰসহ ৰাইজে আটক কৰিলে ড্ৰাগছ সৰবৰাহকাৰীক ৷ ড্ৰাগছ সৰবৰাহকাৰীক উত্তম-মধ্যম শোধাই গতালে আৰক্ষীক ৷
ড্ৰাগছ সৰবৰাহকাৰীৰ বিৰুদ্ধে নগাঁও আৰক্ষী কঠোৰ হোৱাৰ সমান্তৰালকৈ নগাঁৱত সৰবৰাহকাৰীৰ বিৰুদ্ধে সজাগ হৈছে ৰাইজ ৷ শনিবাৰে দুপৰীয়া নগাঁৱত ৰাইজেই আটক কৰিবলৈ সক্ষম হ’ল এটা ড্ৰাগছ সৰবৰাহকাৰী ৷ ড্ৰাগছৰ বিৰুদ্ধে নগাঁও আৰক্ষী অধিক তৎপৰ হোৱাৰ লগে লগে বহু ড্ৰাগছ সৰবৰাহকাৰীয়েও সলনি কৰিছে কৌশল ৷
শনিবাৰে এখন ই-ৰিক্সাত যাত্ৰী নিয়াৰ সলনি ড্ৰাগছ ভৰ্তি কণ্টেইনাৰ লৈ গৈ থকা অৱস্থাত নগাঁৱৰ তেলিয়া পানীগাঁৱত ই-ৰিক্সা চালকজনৰ প্ৰতি সন্দেহৰ সৃষ্টি হয় স্থানীয় একাংশ লোকৰ ৷ ই-ৰিক্সাত লৈ অনা ড্ৰাগছ গ্ৰাহকক বিক্ৰীৰ চেষ্টা কৰাৰ সময়তে স্থানীয় লোকে সন্দেহ কৰি আটক কৰে ই ৰিক্সা চালকজনক ৷ লগে লগে স্থানীয় লোকে ই-ৰিক্সাত তালাচী চলোৱাত ই-ৰিক্সাৰ পৰা উদ্ধাৰ হয় ড্ৰাগছ ভৰ্তি কেইবাটাও কণ্টেইনাৰ ৷
লগতে পঢ়ক : Smuggling of LPG cylinder:মৰাণত ভিডিপি সভাপতিৰ নেতৃত্বত ৰন্ধন গেছৰ চোৰাং বেহা
ই-ৰিক্সাৰ পৰা ড্ৰাগছ ভৰ্তি কণ্টেইনাৰ উদ্ধাৰ হোৱাক লৈ সৃষ্টি হয় উত্তপ্ত পৰিস্থিতিৰ ৷ স্থানীয় একাংশই ড্ৰাগছ সৰবৰাহ কৰা ই-ৰিক্সাৰ চালকজনক উত্তম-মধ্যম শোধায় ৷ পৰৱৰ্তী সময়ত ঘটনাস্থলীত উপস্থিত হোৱা নগাঁৱৰ ইটাচালী আৰক্ষীক স্থানীয় ৰাইজে গতাই দিয়ে ড্ৰাগছ সৰবৰাহকাৰীটোক ৷ ইটাচালী আৰক্ষীয়ে ড্ৰাগছ সৰবৰাহ কৰা ই-ৰিক্সাৰ লগতে ড্ৰাগছ ভৰ্তি কণ্টেইনাৰসহ চালকজনক আটক কৰি আৰক্ষী থানালৈ লৈ যায় ৷
সম্প্ৰতি নগাঁও ইটাচালি আৰক্ষীয়ে ড্ৰাগছ সৰবৰাকাৰীটোক অধিক তথ্যৰ বাবে জেৰা অব্যাহত ৰাখিছে ৷ ইফালে এই বাতৰি যুগুত কৰা পৰ্যন্ত ড্ৰাগছ সৰবৰাহকাৰীটোৰ পৰিচয় জানিবলৈ সক্ষম হোৱা নাই ৷
লগতে পঢ়ক : Fraudster Arrested in Majuli : ভুৱা বিত্তীয় প্ৰতিষ্ঠান খুলি আৰক্ষীৰ জালত প্ৰৱঞ্চক
