ৰহা, 4 মাৰ্চ : ৰহাৰ সমীপৰ জামুগুৰিৰ সাৰ্বজনীন গৰখীয়া থানত বিগত বছৰসমূহৰ দৰে চলিত বৰ্ষতো অহা ৬ মাৰ্চৰ পৰা চাৰিদিনীয়া বৰ্ণাঢ্য কাৰ্যসূচীৰে দৌল মহোৎসৱৰ আয়োজন কৰা হৈছে (preparation for celebrating dol utsav in Assam) । ইতিমধ্যে থান পৰিচালনা আৰু উৎসৱ উদযাপন সমিতিয়ে দৌল উৎসৱৰ যাৱতীয় প্ৰস্তুতি সম্পূৰ্ণ কৰি তুলিছে । উল্লেখযোগ্য যে ১৯৯৩ চনৰে পৰা ক্ৰমাগতভাৱে উদযাপন কৰি অহা সাৰ্বজনীন গৰখীয়া থানৰ দৌল উৎসৱে চলিত বৰ্ষত ৩০ সংখ্যক বৰ্ষত পদাৰ্পণ কৰিছে (Assam dol utsav) ।
৩৫৫ বছৰীয়া ঐতিহ্যমণ্ডিত জামুগুৰিৰ সাৰ্বজনীন গৰখীয়া থানৰ কাৰ্যসূচী অনুসৰি অহা ৬ মাৰ্চত পুৱা পৰিৱেশ নিকাকৰণ, গছ পুলি ৰোপনৰ অন্তত থানৰ ধৰ্মধ্বজা উত্তোলন, স্মৃতি তৰ্পন, দান বৰঙণি- শৰাই-সফুঁৰা গ্ৰহণ, সোঁৱৰণি তোৰণ উন্মোচন, কীৰ্তন পাঠ, দুপৰীয়া প্ৰসংগ, নৱ নিৰ্মিত কাৰ্যালয়ৰ দ্বাৰ আৰু প্ৰদৰ্শনীৰ দ্বাৰ উন্মোচন কৰা হ'ব । বিয়লি শিশু কৃষ্ণ নৃত্য প্ৰতিযোগিতাৰ অন্তত সমূহীয়া বন্তি প্ৰজ্বলন আৰু সান্ধ্য প্ৰসংগৰে দিনটোৰ কাৰ্যসূচীৰ সামৰণি মৰা হ'ব ।
৭ মাৰ্চত পুৱা দৌল মন্দিৰত দৌল ধ্বজা উৰণ, মণিকূট-বন্তি প্ৰজ্বলনৰ পাছত অঞ্চলৰ ২৯ গৰাকী নামঘৰৰ বিষয়ববীয়াই ধৰ্ম ধ্বজা আৰু জলচী লৈ উৎসৱ স্থলীলৈ যাত্ৰা কৰিব ৷ যাত্ৰা কৰাৰ অন্তত ৩০ খনি ধৰ্মধ্বজা উত্তোলনৰ পাছতে গোঁসাই স্নান-স্থাপন আৰু ভকতক নিৰ্মালী প্ৰদান কৰা হ'ব । অনুষ্ঠানত মুখ্য অতিথি ৰূপে স্বাস্থ্য মন্ত্ৰী আৰু বিশিষ্ট অতিথি ৰূপে নগাঁৱৰ আৰক্ষী অধীক্ষক লীনা দলে উপস্থিত থাকিব ।
ইয়াৰ পাছতে খোল-নাম প্ৰসংগ, আপ্যায়ণ, বিয়লি আমন্ত্ৰিত নামতিৰ দ্বাৰা দিহানাম পৰিৱেশন আৰু বন্তি প্ৰজ্বলন কৰা হ'ব । সন্ধ্যা যোৰা পৰিৱেশনৰ অন্তত সম্বৰ্ধনা, সাহাৰ্য প্ৰদান আৰু শৈক্ষিক বঁটা প্ৰদান অনুষ্ঠান অনুষ্ঠিত হ’ব । নিশা দলৈগাঁও আৰু ন দলৈ গাঁৱৰ মহিলা শিল্পীসকলৰ দ্বাৰা "মচুকুণ্ড ৰজাৰ কৃষ্ণ দৰ্শন" ভাওনাখনি মঞ্চস্থ কৰা হ'ব । ভাওনাখনি উদ্বোধন কৰিব বটদ্ৰৱা সমষ্টিৰ বিধায়িকা শিৱামণি বৰাই ।
৮ মাৰ্চত পুৱা পৱিত্ৰ হোলী খেলাৰ অন্তত কীৰ্তন পাঠ, দিহানাম পৰিবেশন, সান্ধ্য প্ৰসংগ আৰু আদৰণি-সম্বৰ্ধনা অনুষ্ঠান অনুষ্ঠিত হ’ব । নিশা মৰিগাঁৱৰ দক্ষিণ বাৰপূজীয়া জনজাতীয় লোকবাদ্য দলে বাৰেৰহণীয়া সাংস্কৃতিক অনুষ্ঠান পৰিবেশন কৰিব ।
৯ মাৰ্চত পৰিৱেশ নিকাকৰণৰ অন্তত অঞ্চলৰ সমূহ ভক্তপ্ৰাণ ৰাইজৰ সহযোগত ময়ূৰ পংখী ৰথত দৌল গোবিন্দ গোঁসাইক ভ্ৰমণ কৰোৱা হ'ব । ইয়াৰ পাছতে কীৰ্তন পাঠ আৰু ধৰ্মধ্বজা অৱনমন-সমূহীয়া ঘোষাৰে দৌল উৎসৱৰ সামৰণি মৰা হ'ব বুলি উদ্যোক্তাসকলে জনাইছে । উল্লেখ্য যে ৩০ সংখ্যক দৌল উৎসৱৰ লগত সংগতি ৰাখি ৬ মাৰ্চৰ বিয়লি আয়োজিত শিশু কৃষ্ণ নৃত্য প্ৰতিযোগিতাৰ ভৰ্তি মাচুল ১০০ টকাকৈ ধাৰ্য কৰা হৈছে । প্ৰতিযোগিতাত শ্ৰেষ্ঠ বিবেচিত তিনিগৰাকী প্ৰতিযোগীক ক্ৰমে ৩০০১, ২০০১ আৰু ১০০১ টকাৰে পুৰস্কৃত কৰা হ'ব । সবিশেষ জানিবৰ বাবে ৭০০২৬৯২৮৬৮ নাইবা ৯৩৬৫০৮০২৮৫ নম্বৰত যোগাযোগ কৰিবলৈ অনুৰোধ জনোৱা হৈছে ।
লগতে পঢ়ক : Devi Dol in crisis : দেৱীদৌলৰ প্ৰতি ভাবুকি, পুৰাতত্ব বিভাগৰ বিৰুদ্ধে সৰৱ স্থানীয় সংগঠন
