ৰহা, ২২ অক্টোবৰ: দীপাৱলীৰ সময়ত বজাৰৰ জাকজকমীয়া লাইটেৰে বাসগৃহ সজাই তুলিলেও মাটি চাকিৰ অবিহনে যেন সকলো আধৰুৱা । সেয়ে এতিয়াও সমাদৰ লাভ কৰে মাটিৰ চাকিয়ে । বিগত বৰ্ষত মহামাৰী, লকডাউনৰ বাবে ব্যৱসায়ত লোকচানৰ সন্মুখীন হোৱাৰ পিছত এতিয়া পুনৰ মনত আশা লৈ ন-উদ্যমেৰে মাটিৰ চাকি প্ৰস্তুত কৰিছে মৃৎ শিল্পীসকলে । ব্যতিক্ৰম নহয় ৰহাৰ ডালিমবাৰী মৃৎ শিল্পীসকল (Pottery in Dalimbari of Raha)।
দ্বীপান্বিতাত পোহৰাবলৈ ব্যস্ত ৰহাৰ মৃৎ শিল্পীসকল (pottery artists of Raha busy lighting up)। পোহৰৰ উৎসৱ দীপাৱলীলৈ মাজত মাথোঁ দুদিন । ব্যস্ততাৰ অন্ত নাইকিয়া হৈছে মৃৎ শিল্পীসকলৰ । ৰহাৰ ডালিমবাৰী সেন্দুৰীয়াতো দিনে ৰাতিয়ে মাটিৰ চাকি বনোৱাত ব্যস্ত মৃৎশিল্পীসকল ।
একমাত্ৰ মৃৎ শিল্পৰ জৰিয়তে জীৱন নিৰ্বাহ কৰি অহা সেন্দুৰীয়াৰ দহটাকৈ পৰিয়ালে দিন ৰাতি একাকাৰ কৰি তৈয়াৰ কৰিছে হাজাৰ হাজাৰ মাটিৰ চাকি। পূৰ্ব পুৰুষৰ পৰা কৰি অহা এই পৰম্পৰা হেৰাই যাব দিয়া নাই সেন্দুৰীয়াৰ দহটা পৰিয়ালে । মৃৎ শিল্পই তেওঁলোকৰ জীৱিকাৰ সম্বল । মাহে দহ পোন্ধৰ হাজাৰ উপাৰ্জনৰে নিয়াৰিকৈ চলি যায় পৰিয়ালসমূহ ।
এইবাৰ দীপাৱলীৰ বাবে প্ৰতিটো পৰিয়ালে ২০ৰ পৰা ৭০ হাজাৰ পৰ্যন্ত মাটিৰ চাকি তৈয়াৰ কৰিছে (Diwali in Assam)। এই মাটিৰ চাকিবোৰ বিক্ৰী কৰে নগাঁও,মৰিগাঁও জিলাৰ বিভিন্ন বজাৰ আৰু দোকানত । উল্লেখ্য় যে মৃৎ শিল্পত চৰকাৰে অনুদান নিদিলেও পৰম্পৰাগত ভাৱে এই শিল্পটোক জীয়াই ৰাখিছে সেন্দুৰীয়াৰ এই দহটা পৰিয়ালে । সেয়ে এতিয়া দীপাৱলীৰ সময়ত ব্যস্ত হৈ পৰিছে মৃৎ শিল্পৰ পুৰুষ-মহিলা সকলো ।
দীপাৱলীৰ আকাশ পোহৰাই তোলা এই মৃৎ শিল্পীসকলৰ পিছে নিজৰ পৰিয়ালবোৰ যেন এন্ধাৰতহে থাকে ৷ কোনোমতে পৰিয়াল পোহপাল দি থকা এই মৃৎ শিল্পীসকললৈ নাই কোনো চৰকাৰী সাহায্য ৷ শিল্পটো জীয়াই ৰাখিবলৈ মৃৎ শিল্পীসকলে কেঁচামাল হিচাপে ব্যৱহাৰ কৰা মাটিখিনি চৰকাৰে বিনামূলীয়াভাৱে সংগ্ৰহৰ অনুমতি দিলে নিশ্চয়কৈ মৃৎ শিল্পীসকল উপকৃত হ'ব ৷ তাৰ বাবে চৰকাৰক বিহীত ব্যৱস্থা গ্ৰহণৰ দাবী জনাইছে এই মৃৎ শিল্পীসকলে ৷
