নগাঁও, 20 অক্টোবৰ : সাৱধান। দুশ টকীয়া অথবা পাঁচশ টকীয়া নোট হাতত পৰাৰ লগে লগে ভালদৰে এবাৰ পৰীক্ষা কৰি ল'ব । অন্যথা বিপদত পৰিব পাৰে আপুনি । এতিয়া পূজাৰ বতৰত বজাৰত সক্ৰিয় হৈছে একাংশ জালনোট সৰবৰাহকাৰী চক্ৰ । শাৰদীয় দুৰ্গোৎসৱৰ ধামখুমীয়াৰ পূৰ্ণ সুযোগ গ্ৰহণ কৰি বজাৰত জালনোট মেলি দিয়াৰ চক্ৰান্ত কৰিছে দুষ্টচক্ৰই ।
জালনোট চক্ৰৰ বিৰুদ্ধে ব্যাপক অভিযান চলাই নগাঁৱৰ ধিং আৰক্ষীয়ে ৷ বুধবাৰে জালনোট সৰবৰাহকাৰীৰ বিৰুদ্ধে অভিযান চলাই নগাঁৱৰ ধিং আৰক্ষীয়ে । ধিং আৰক্ষী থানাৰ ভাৰপ্ৰাপ্ত বিষয়া আদিত বড়োৰ নেতৃত্বত আৰক্ষীৰ এটা দলে ধিঙৰ মাগুৰমাৰী অঞ্চলত অভিযান চলাইত বৃহৎ পৰিমাণৰ দুশ টকীয়া জালনোট জব্দ কৰিবলৈ সক্ষম হয় । লগতে আৰক্ষীৰ দলটোৱে জালনোট সৰবৰাহৰ সৈতে জড়িত আজিজুৰ ৰহমান নামৰ সৰবৰাহকাৰীক আটক কৰিবলৈ সক্ষম হয়।
আৰক্ষীয়ে ধৃত আজিজুৰৰ পৰা 71,800 টকাৰ জালনোট জব্দ কৰিবলৈ সক্ষম হয় ৷ আৰক্ষীয়ে অধিক তথ্যৰ বাবে ধৃত আজিজুৰক চলোৱা জেৰাৰ অন্তত শুকুৰবাৰে আদালতত হাজিৰ কৰায় ৷
উল্লেখ্য যে জালনোট সৰবৰাহৰ এগৰাকী সদস্যক গ্ৰেপ্তাৰ কৰি চক্ৰটোৰ শিপা বিচাৰি লখিমপুৰ জিলাত অভিযান চলাই এক বিতৰ্কত সাঙোৰ খাই পৰিছিল প্ৰয়াত আৰক্ষী বিষয়া জোনমণি ৰাভা । আনকি অসম আৰক্ষীৰ উপ-পৰিদৰ্শক জোনমণি ৰাভাৰ মৃত্যুৰ পিচতেই জালনোট আৰু নকল সোণ ব্যৱসায়ৰ এক ভয়ংকৰ তথ্যও পোহৰলৈ আহিছিল । যি বিতৰ্ক এই পৰ্য্যন্ত কেন্দ্ৰীয় অনুসন্ধান সন্থা চি বি আইৰ তদন্তৰ আঁওতাত আছে ।
এতিয়া নগাঁৱৰ ধিঙত বৃহৎ পৰিমাণৰ জালনোটসহ এটা সৰবৰাহকাৰী আটক হোৱা ঘটনাৰ পিচতেই আৰম্ভ হৈছে নতুন চর্চা। বিভিন্নজনৰ মনত উত্থাপন হৈছে নানা প্ৰশ্নৰ। এতিয়াও সক্ৰিয় হৈ আছে নেকি জালনোট সৰবৰাহকাৰী চক্ৰ?
