চামগুৰি, 7 নৱেম্বৰ: চামগুৰিৰ নীলাপানী হ্ৰদ (Paradise lake)ত পুনৰ অঘটন ৷ শুকুৰবাৰে বিয়লি হ্ৰদটোত সাঁতুৰিবলৈ গৈ এই পৰ্যন্ত সন্ধান নাই নগাঁৱৰ ইটাচালিৰ আয়নাভ হাজৰিকা নামৰ যুৱকজনৰ ৷ জানিব পৰা মতে,শুকুৰবাৰে বিয়লি ভাগত গুৱাহাটীৰ এজন বন্ধুৰ সৈতে হ্ৰদটোত ফটো উঠিবলৈ গৈছিল যুৱকজন৷ ইয়াৰ পাছতে হ্ৰদটোত সাঁতুৰাৰ মন মেলে যুৱকজনে ৷ একাংশই বাধা দিয়াৰ পিছতো হ্ৰদৰ পানীত নামিছিল যুৱকজন ৷ তাৰ পাছৰে পৰাই সন্ধানহীন হৈ আছে আয়নাভ হাজৰিকা নামৰ যুৱকজন ৷
ঘটনাৰ খবৰ পোৱাৰ পাছতেই ঘটনাস্থলীত উপস্থিত হৈ আৰক্ষীয়ে ঘটনাৰ তদন্ত কৰে যদিও সন্ধান নোলাল যুৱকজনৰ ৷ ইফালে আন্ধাৰ হোৱাৰ বাবে শুকুৰবাৰে নিশা উদ্ধাৰ অভিযান স্থগিত ৰাখে আৰক্ষীয়ে ৷ শনিবাৰে পুনৰ উদ্ধাৰ অভিযান চলাব উদ্ধাৰকাৰী দলে ৷ প্ৰত্যক্ষ দৰ্শীয়ে জনোৱা অনুসৰি উক্ত স্থানত নিচা জাতীয় দ্ৰৱ সেৱন কৰিছিল দুই বন্ধুৱে ৷ ঘটনা সন্দৰ্ভত আৰক্ষীৰ তদন্ত অব্যাহত ৷
লগতে পঢ়কঃ অসমত পুনৰ বিজেপিৰ চৰকাৰ : মনোজ বৰুৱা
