দুৰ্ঘটনাত নিহত ট্ৰেক্টৰ চালক

হাল বাই থকাৰ অৱস্থাতে নিয়ন্ত্ৰণ হেৰুৱাই বাগৰি পৰিল ট্ৰেক্টৰ ৷ নিহত ইক্ৰামুল হকৰ মৃতদেহ মৰোণোত্তৰ পৰীক্ষাৰ বাবে প্ৰেৰণ কৰিছে আৰক্ষীয়ে ৷ আনহাতে কুমাৰীকাটাৰ ৰঙিয়া-ভূটান আন্তঃৰাষ্ট্ৰীয় ঘাইপথত দুৰ্ঘটনাত প্ৰাণ হেৰুৱালে আন এজন ব্যক্তিয়ে ৷

নিউজ ডেস্ক , 10 ফেব্ৰুৱাৰীঃ সোমবাৰে নগাঁও জিলাৰ ৰূপহীহাটত সংঘটিত হয় এক ভয়ংকৰ ট্ৰেক্টৰ দুৰ্ঘটনা ৷ দুৰ্ঘটনাটোত থিতাতে প্ৰাণ হেৰুৱালে এজন ব্যক্তিয়ে ৷ ঘটনাৰ বিৱৰণী অনুসৰি, পথাৰত হালবাই থকা অৱস্থাত হঠাতে নিয়ন্ত্ৰণ হেৰুৱাই বাগৰি পৰে ট্ৰেক্টৰখন আৰু ঘটনাস্থলীতেই মৃত্যু হয় টেক্টৰখনৰ চালক ইক্ৰামুল হকৰ ৷ ৰূপহীহাটৰ তাৰাবাৰীত সংঘটিত হোৱা দুৰ্ঘটনাটোত মৃত্যু হোৱা ইক্ৰামুলৰ ঘৰ কান্ধুলি মাৰিত বুলি জানিব পৰা গৈছে ৷ দুৰ্ঘটনাত পতিত হোৱা ট্ৰেক্টৰখনৰ নম্বৰ NL- 08D-1703 ৷ দুৰ্ঘটনাটো সংঘটিত হোৱাৰ পাছতেই ঘটনাস্থলীত ৰূপহী থানাৰ আৰক্ষী উপস্থিত হৈ মৃতদেহটো মৰনোত্তৰ পৰীক্ষাৰ বাবে নগাঁৱলৈ প্ৰেৰণ কৰিছে ৷

আনহাতে সোমবাৰে কুমাৰীকাটাৰ ৰঙিয়া-ভূটান আন্তঃৰাষ্ট্ৰীয় ঘাইপথত সংঘটিত আন এক পথ দুৰ্ঘটনাত নিহত হয় এগৰাকী লোক ৷ বাক্সা জিলাৰ তামুলপুৰ আৰক্ষী থানাৰ অন্তৰ্গত কুমাৰীকাটা আৰক্ষী চকীৰ অধীনৰ ৰঙিয়া ভূটান ৰাষ্ট্ৰীয় ঘাইপথৰ গোপীনাথপুৰত সংঘটিত পথ দুৰ্ঘটনাটোত নিহত ব্যক্তি গৰাকীৰ নাম ইকৰাম আলী বুলি জানিব পৰা গৈছে ৷ ঘটনাৰ বিবৰণী অনুসৰি , সোমবাৰে পুৱা 11 বজাত ইকৰাম আলীয়ে নিজৰ বাহন (এছ ০১ ই এইচ ৪১৭৬) নম্বৰৰ ভেনু বাহন খনেৰে দৰঙ্গামেলাৰ পৰা কুমাৰীকাটালৈ আহি আছিল। তেনে সময়তে গাড়ী খনে নিয়ন্ত্ৰণ হেৰুৱাই গোপীনাথপুৰৰ ভঙা আলীত পথ দুৰ্ঘটনাত পতিত হয় ৷ দুৰ্ঘটনাটোত গুৰুতৰভাৱে আঘাটপ্ৰাপ্ত হয় নিহত ইকৰাম আলীৰ ভগ্নী জ্যোৎস্না বেগমৰ লগতে ভাগিন ইছান আলী ৷ উন্নত চিকিৎসাৰ বাবে আহত জ্যোৎস্না বেগম আৰু ইছান আলীক গুৱাহাটী চিকিৎসা মহাবিদ্যালয় হাস্পাতাললৈ প্ৰেৰণ কৰা হৈছে ৷ স্থানীয় ৰাইজৰ অভিযোগ , সঘনাই দুৰ্ঘটনা সংঘটিত হোৱা ৰঙিয়া-ভূটান আন্তঃৰাষ্ট্ৰীয় ঘাইপথ পৰিণত হৈছে মৃত্যুদূতলৈ ৷ উল্লেখযোগ্য যে, দেওবাৰেও ৰঙিয়া-ভূটান আন্তঃৰাষ্ট্ৰীয় ঘাইপথৰ বৰখোপাত পথ দুৰ্ঘটনাত আহত হৈছিল 8 গৰাকীকৈ লোক ৷

লগতে পঢ়কঃপাহৰণিৰ গৰ্ভত মাইলছ ব্রনছন