নগাঁও, 20 মে' : ক'ভিডৰ পাচতে ৰাজ্যৰ চাৰিও দিশে এতিয়া ব্লেক ফাংগাছৰ আতংকই বিৰাজ কৰিছে ৷ ব্লেক ফাংগাছত আক্ৰান্ত হৈ ৰাজ্যত পুনৰ এজন যুৱকৰ মৃত্যু হৈছে ৷ পলমনি বৰা নামৰ যুৱক জনৰ ঘৰ নগাঁও জিলাৰ ধিঙত বুলি জানিব পৰা গৈছে ৷
জানিব পৰা মতে যুৱকজনৰ গাত কেইদিনমানৰ আগতে ক'ভিডৰ উপস্থিতি পোৱা গৈছিল ৷ উশাহ লোৱা কিছু অসুবিধা হোৱাৰ বাবে যুৱক জনক নগাঁৱৰ ভোগেশ্বৰী ফুকননী চৰকাৰী চিকিৎসালয়ত ভৰ্তি কৰা হৈছিল ৷ ইয়াৰ পাচতে যুৱক জন সুস্থ হোৱাত চিকিৎসালয়ৰ পৰা ঘৰলৈ যাবলৈ দিয়া হয় ৷ কিন্তু দুদিনৰ পাচতে পুনৰ যুৱকজন অসুস্থ হৈ পৰাত নগাঁৱৰ এখন ব্যক্তিগত চিকিৎসালয়ত ভৰ্তি কৰোৱা হয় ।
কিন্তু যুৱকজনৰ অৱস্থা সংকটজনক দেখি চিকিৎসকে গুৱাহাটীলৈ প্ৰেৰণ কৰে আৰু যুৱকজনক গুৱাহাটীৰ এপল' হাস্পতালত ভৰ্তি কৰে পৰিয়ালৰ লোকে । এপল' হাস্পতালতে যুৱকজনৰ শৰীৰত ব্লেক ফাংগাছৰ লক্ষণ ধৰা পৰে ৷ যুৱকজনৰ চিকিৎসা সেৱা অব্যাহত ৰাখিছিল যদিও অৱশেষত মৃত্যুক সাৱতি লয় যুৱকজনে ৷
লগতে পঢ়ক: ক’ভিড পৰিস্থিতিৰ বুজ ল’বলৈ বৰপেটাত উপস্থিত মুখ্যমন্ত্ৰী
