নগাঁও, 25 ছেপ্টেম্বৰঃ যুৱতীক টাৰ্গেট কৰি বিপদত পৰিল চিলনী চোৰ ৷ আৰক্ষীয়ে কৰিব নোৱাৰা কাম কৰি দেখুৱালে দুগৰাকী যুৱতীয়ে ৷ অভিযোগ অনুসৰি, দীৰ্ঘদিন ধৰি নগাঁৱৰ ৰাজপথত অব্যাহত আছিল চিলনী চোৰৰ সন্ত্ৰাস ৷ পথচাৰীৰ পৰা বাইক আৰোহী লৈকে কোনোৱে সাৰি যাব পৰা নাছিল চিলনী চোৰৰ পৰা ৷ চকুৰ পঁচাৰতে আপোনাৰ পৰা থপিয়াই কাঢ়ি লৈ যাব পাৰে যিকোনো সামগ্ৰী ৷ কিন্তু মঙলবাৰে নগাঁৱৰ ৰীণা দাস শইকীয়া আৰু গোৰ্মিত কৰ নামৰ যুৱতী দুগৰাকীক টাৰ্গেট কৰোতেই বিপদত পৰিল চিলনী চোৰ ৷ জানিব পৰা মতে, স্কুটিৰে গৈ থকা অৱস্থাত নগাঁৱৰ মধুপুৰত আন এখন স্কুটিৰে অহা দুটা চিলনী চোৰে পিছফালৰ যুৱতী দুগৰাকীৰ পৰা থপিয়াই নিছিল মোবাইল আৰু হেণ্ড বেগ । তাৰ পাচতেই চোৰ দুটাই দ্ৰুত বেগেৰে পলায়নৰ চেষ্টা কৰে ৷ কিন্তু কোনো গুণে কম নাছিল যুৱতী দুগৰাকী । অতি সাহসিকতাৰে যুৱতী দুগৰাকীও দ্ৰুত বেগেৰে পিছা লয় চোৰ দুটাৰ ৷ অৱশেষত উপায়ন্তৰ হৈ চোৰ দুটাই স্কুটি এৰি পলাবলৈ বাধ্য হয় ৷
ইয়াৰ পাচতেই সাহসী যুৱতী দুগৰাকীয়ে ঘটনা সন্দৰ্ভত আৰক্ষীক খবৰ দিয়ে ৷ পৰৰ্বতী সময়ত আৰক্ষীয়ে ঘটনাস্থলীত উপস্থিত হৈ স্কুটিখন জব্দ কৰি অনুসন্ধান চলাই চোৰ দুটাকো আটক কৰিবলৈ সক্ষম হয় ৷ আটকাধীন চোৰ দুটা নগাঁৱৰে জিয়াওল হক আৰু চাকিল হুছেইন বুলি জানিব পৰা গৈছে ৷
ইফালে নগাঁৱত অপৰাধ নিৰ্মূলৰ বাবে আৰক্ষী অধীক্ষক শংকৰ ব্ৰত ৰায় মেধিয়ে ন ন পদক্ষেপ গ্ৰহণ কৰাৰ সময়তে নগাওঁ নগৰ আৰক্ষীৰ নীৰৱতাৰ সুযোগ লৈ চহৰখনত অব্যাহত থকা চিলনী চোৰৰ সন্ত্ৰাসে চিন্তিত কৰি তুলিছে নগাঁৱৰ ৰাইজক ৷ এইবাৰ চিলনী চোৰৰ সন্ত্ৰাস ৰোধত ব্যৰ্থ আৰক্ষীয়ে সহায় বিচাৰিলে সাধাৰণ ৰাইজ আৰু সংবাদ মাধ্যমৰ ৷ আনহাতে আৰক্ষীয়ে কৰিব নোৱাৰা কাম সাহসীকতাৰে কৰি দেখুওৱা দুই যুৱতীক সম্বৰ্ধনা জ্ঞাপন কৰে আৰক্ষীয়ে ।
