চামগুৰি,16 ছেপ্টেম্বৰ : পুত্ৰৰ ৰহস্যজনক মৃত্যুৰ তদন্ত আৰু ন্যায় বিচাৰি দুৰ্ভগীয়া মাতৃৰ সংবাদমেল ৷ বুকুত পুত্ৰৰ ফটো সাৱতি লৈ হাতযোৰ কৰি ন্যায় বিচাৰিছে নগাঁও চামগুৰিৰ ফটো সাংবাদিক ধন্তি হীৰাৰ মাতৃয়ে ৷ শনিবাৰে ধন্তি হীৰাৰ মাতৃয়ে সংবাদমেলত নগাঁও আৰক্ষীৰ তদন্ত প্ৰক্ৰিয়াক লৈ আক্ষেপ প্ৰকাশৰ লগতে তেওঁৰ পুত্ৰক হত্যা কৰা বুলি অভিযোগ উত্থাপন কৰে ৷ উল্লেখ্য যে যোৱা 16 জুলাইত ৰহস্যজনক অৱস্থাত চামগুৰিৰ বৰভেঁটিত উদ্ধাৰ হৈছিল ফটো সাংবাদিক ধন্তি হীৰাৰ মৃতদেহ ৷
নিহত ধন্তিৰ পৰিয়ালৰ অভিযোগ অনুসৰি ধন্তি হীৰাক পৰিকল্পিতভাৱে হত্যা কৰাৰ হৈছিল ৷ কিন্তু খাটোৱাল থানাৰ আৰক্ষী বিষয়া ৰঞ্জিত গগৈয়ে সমগ্ৰ ঘটনাক দুৰ্ঘটনাৰ ৰূপ দি তদন্তৰ নামত ভেঁকোভাওনা কৰা অভিযোগ তুলিছে ভুক্তভোগী পৰিয়ালে ৷ কেৱল সিমানে নহয় হত্যাকাৰীক ৰক্ষণাবেক্ষণ দিয়াৰ গুৰুত্বৰ অভিযোগ উত্থাপন কৰে ধন্তিৰ পৰিয়ালে ৷
নগাঁও প্ৰেছ ক্লাৱত দিয়া এক সংবাদমেলত মৃত ধন্তি হীৰাৰ মাতৃ আৰু ভগ্নীয়ে আৰক্ষীৰ ভূমিকাত ক্ষোভ প্ৰকাশ কৰে ৷ ‘‘সমগ্ৰ ঘটনাৰ সন্দৰ্ভত মুখ্যমন্ত্ৰীৰ আগত SIT গঠনৰ কথা কৈছিল নগাঁৱৰ আৰক্ষী অধীক্ষকগৰাকীয়ে ৷ কিন্তু কোনো বিশেষ তৎপৰতা নেদেখোৱাটো অতি দুৰ্ভাগ্যজনক’’ বুলিও আক্ষেপ প্ৰকাশ কৰে ভুক্তভোগী পৰিয়ালে ৷ তদুপৰি ধন্তি হীৰাৰ মৰণোত্তৰ পৰীক্ষাৰ প্ৰতিবেদনটো মূৰৰ পিচফালে আৰু বুকুত আঘাতৰ চিন থকা কথা উল্লেখ আছে বুলি সংবাদমেলত সদৰী কৰে ধন্তিৰ পৰিয়ালে ৷ এনে অৱস্থাত ধন্তি হীৰাৰ ৰহস্যজনক মৃত্যুৰ তদন্ত আৰু ন্যায় প্ৰদানৰ ক্ষেত্ৰত মুখ্যমন্ত্ৰী হিমন্ত বিশ্ব শৰ্মা আৰু অসম আৰক্ষী সঞ্চালক প্ৰধান জিপি সিঙৰ হস্তক্ষেপ বিচাৰি কাতৰ আহ্বান জনাইছে ধন্তিৰ মাতৃয়ে ৷
লগতে পঢ়ক:Public Protest in Nagaon: সুলভ মূল্যৰ দোকানীৰ বিৰুদ্ধে চৰকাৰী চাউলৰ লুণ্ঠনৰ অভিযোগেৰে উত্তপ্ত নগাঁও
