বটদ্ৰৱা,14 এপ্ৰিলঃ লক ডাউনৰ বাবে সকলো ধৰণৰ যান-বাহনৰ চলাচল বন্ধ হৈ পৰাত সমস্যা সৃষ্টি হৈছে ৰাজ্যত ৷ বিশেষকৈ স্বাস্থ্য খণ্ডত সৃষ্টি হৈছে চৰম প্ৰত্যাহ্বান ৷ বৃহত্তৰ ধিং অঞ্চলতো একে সমস্যাৰ উদ্ভৱ হৈছে ৷ অঞ্চলটোৰ ৰাইজৰ একমাত্র ভৰসা এতিয়া মৃত্যুঞ্জয় 108 এম্বুলেঞ্চ সেৱা ৷ লক ডাউনৰ বাবে ৰাজ্যত অত্যাৱশ্য়কীয় তথা জৰুৰীকালীন সেৱাসমূহ অপৰিৱৰ্তিত থকাৰ কথা ঘোষণা কৰিছিল ৰাজ্য চৰকাৰে ৷ বিপৰীতে নগাঁৱৰ ধিঙত দেখিবলৈ পোৱা যায় এক বিপৰীত ছবি । জৰুৰীকালীন সেৱাত নিয়োজিত মৃত্যুঞ্জয় 108 এম্বুলেঞ্চৰ পৰিৱৰ্তে ঠেলাৰে চিকিৎসালয়লৈ নিবলগা হয় এগৰাকী ৰোগীক ।
ঘটনাৰ বিৱৰণী অনুসৰি, বটদ্ৰৱাৰ কদমণি গাঁৱৰ এগৰাকী ব্যক্তি গছৰ পৰা পৰি গুৰুতৰভাৱে আঘাতপ্রাপ্ত হয় । পৰিয়ালৰ লোকে ঘটনা সংক্ৰান্তত 108 এম্বুলেঞ্চক বাৰম্বাৰ ফোন কৰি লাভ নকৰিলে কোনো সুদুত্তৰ ৷ উপায়বিহীন পৰিয়ালটোৱে ঠেলাৰ সহায়ত প্ৰায় 7 কিল’মিটাৰ পথ অতিক্রম কৰি উপস্থিত হয় ধিঙৰ গ্ৰাম্য চিকিৎসালয়ত ৷ স্থানীয় লোকৰ অভিযোগ অনুসৰি 108 এম্বুলেঞ্চ সেৱাৰ এনে কাৰ্য এতিয়া নিত্য-নৈমিত্তিক ঘটনাত পৰিণত হৈছে ।
যি সময়ত কৰ’ণা ভাইৰাছৰ বিৰুদ্ধে চৰকাৰৰ স্বাস্থ্য বিভাগে গ্ৰহণ কৰা বিশেষ তৎপৰতাৰ বাবে অসমবাসীৰ ভূয়সী বুটলিবলৈ সক্ষম হৈছে, সেই সময়ত মৃত্যুঞ্জয় 108 সেৱাৰ দায়িত্বজ্ঞানহীন কাৰ্যত তীব্ৰ প্ৰতিক্ৰিয়া সৃষ্টি হৈছে ধিঙত । স্বাস্থ্য মন্ত্ৰী ডঃ হিমন্ত বিশ্ব শর্মাক এই সেৱা নিয়মীয়া ৰূপত কাৰ্যকৰী কৰিবলৈ বৃহত্তৰ অঞ্চলটোৰ সচেতন মহলৰ লগতে স্থানীয় ৰাইজে অনুৰোধ জনাইছে ।
লগতে চাওকঃ মুখ্যমন্ত্ৰীৰ আহ্বানক সহাঁৰি জনাই চাকি জ্বলাবলৈ আহ্বান বিধায়ক ৰণজিৎ দাসৰ
