বঢ়মপুৰ, 26 জুলাই : সময়মতে প্ৰাপ্য ধন নাপায় ক্ষোভিত জেচিবিৰ গৰাকী ৷ কাম কৰা ধন নাপায় জেচিবি লৈ পথ খান্দিবলৈ আহিল এজন শ্ৰমিক ৷ প্ৰাপ্য ধন নাপায় পঞ্চায়তে নিৰ্মাণ কৰা পথ খান্দিবলৈ জেচিবি লৈ আহিল জেচিবিৰ মালিকৰ ৷ চৰকাৰী আঁচনিৰ ধন হৰলুকী কৰি কাম সমাপ্ত হোৱাৰ পিচতো জেচিবি মালিকক ধন নিদিয়াত ঠিকাদাৰৰূপী প্ৰাক্তন সভাপতি পোনা বৰাৰ বিৰুদ্ধে জাঙুৰ খাই উঠিছে জেচিবিৰ মালিক ৷
নগাঁও জিলাৰ কঠিয়াতলী উন্নয়ন খণ্ডৰ অন্তৰ্গত চাংচকী পঞ্চায়তৰ 21-22 বৰ্ষত প্ৰায় 7 লাখ টকা ব্যয় সাপেক্ষে MGNREGA আঁচনিৰ জৰিয়তে এটি পথৰ নিৰ্মাণকাৰ্য আৰম্ভ কৰিছিল প্ৰাক্তন সভাপতি পোনা বৰাই ৷ নিয়ম অনুসৰি পঞ্চায়তে কৰিব লগা চৰকাৰী আঁচনিৰ কামসমূহ চাংচকী পঞ্চায়তৰ সভানেত্ৰী দীপিকা বৰাই ঠিকাদাৰৰ হাতত অৰ্পণ কৰিছিল আৰু এই কামত ব্যাপক দুৰ্নীতি সংঘটিত হোৱাৰ অভিযোগ উত্থাপন হৈছে ৷ যাৰ বাবে প্ৰাপ্য ধন বছৰ উকলি যোৱাৰ পিচতো লাভ কৰা নাই জেচিবি মালিকে ৷
কেবাবাৰো প্ৰাপ্য ধন বিচৰাৰ পিচতো লাভ নকৰাত অৱশেষত পঞ্চায়তে নিৰ্মাণ কৰা পথ খান্দিবলৈ উদ্যত হয় জেচিবিৰ মালিকে ৷ অৱশ্যে পৰৱৰ্তী সময়ত ৰাইজৰ অনুৰোধত পথটো খন্দাৰ পৰা বিৰত থাকে জেচিবিৰ মালিকজন ৷ এতিয়া প্ৰশ্ন হয়, কাৰ অনুমতি লৈ পঞ্চায়তৰ সভানেত্ৰীগৰাকীয়ে চৰকাৰী আঁচনিৰ কামসমূহ ঠিকাদাৰক কৰিবলৈ দিয়ে ৷
উল্লেখ্য যে, দুৰ্নীতিৰ ক্ষেত্ৰত শূন্য সহনশীলস্থিতি গ্ৰহণ কৰা বুলি দাবী কৰি অহা বিজেপি চৰকাৰখনৰ দিনতে বিজেপিৰ জনপ্ৰতিনিধিৰ লগতে বিজেপি কৰ্মীৰ দুৰ্নীতি পোহৰলৈ আহিছে ৷ ইয়াৰ উচিত তদন্ত হ'ব নে বুলি প্ৰশ্ন উত্থাপন হৈছে ৷
লগতে পঢ়ক : Namrup BVFCL : বন্ধ নহয় নামৰূপ সাৰ কাৰখানা, বৰং কৰা হ‘ব আধুনিকীকৰণ
