নগাঁও,24 অক্টোবৰ: কামপুৰ আৰু যমুনামুখৰ মাজত উত্তৰ পূব সীমান্ত ৰেল'ৱেয়ে নিৰ্মাণ কৰি আছে দ্বৈত ৰে’লপথ আৰু কামপুৰ ৰে’ল ষ্টেচন ৷ ৰে'ল পথ নিৰ্মাণ কাৰ্যত ব্যৱহৃত হৈছে বৃহৎ পৰিমাণৰ শিল। কিন্তু এই শিল সমূহক লৈ উঠিছে গুৰুতৰ অভিযোগ ৷ ক'ৰ পৰা আহিছে এই শিল সমূহ,কোনে যোগান ধৰিছে শিল সমূহ ৷ ৰে’ল পথ নিৰ্মাণত ব্যৱহাৰ হোৱা শিল সমূহ অবৈধ বুলি অভিযোগ উত্থাপন হোৱাৰ পাচতেই নগাঁও জিলাৰ বন বিভাগৰ অভিযান ৷
বন বিভাগে 57 টা ষ্টেকৰ বৈধ চালান বিচাৰি জাননী জাৰি কৰিছে শিল যোগান ধৰা ব্যৱসায়ী সকলক ৷ কিন্তু এই পৰ্যন্ত কোনো বৈধ চালান দেখুৱাব পৰা নাই শিল ব্যৱসায়ী সকলে ৷ ৰে'লৱে ঠিকাদাৰ,বন বিষয়াৰ লগতে একাংশ কামপুৰৰ বিজেপি নেতা-পালি নেতাই চালান বিহীন ভাৱে পাহাৰৰ পৰা শিল কঢ়িয়াই আনি চৰকাৰক কৰ ফাঁকি দিয়াৰ গুৰুতৰ অভিযোগ উত্থাপিত হৈছে ।
জানিব পৰা মতে,চালান বিহীন ভাৱেই কামপুৰলৈ নিশা হ'লেই আহে শ-শ শিল ভৰ্তি ডাম্পাৰ। এনে গুৰুতৰ অভিযোগ উত্থাপনৰ পাচতেই বৈধ চালান বিচাৰি নগাঁৱৰ বন বিষয়া উপস্থিত হৈ জাননী জাৰি কৰে ৷ কিন্তু বৰ্তমানও কামপুৰৰ বন বিভাগ কুম্ভকৰ্ণ নিদ্ৰাত। অবাধে চলি অহা বনজ সম্পদ ধ্বংস অভিযানৰ বিৰুদ্ধে উচ্চ স্তৰীয় তদন্তৰ দাবী স্থানীয় লোকৰ ৷
