কলিয়াবৰ, ২৮ আগষ্ট : এফালে খৰাং বতৰ ৷ আনফালে পানীৰ অভাৱত নষ্ট হৈছে হাজাৰ বিঘা কৃষিভূমি । কলিয়াবৰৰ মাধতাৰী গাঁৱৰ পথাৰত এতিয়া মূৰে-কপালে হাত দিছে উপায়হীন খেতিয়ক ৰাইজে । শুকান পথাৰৰ শুকাই যোৱা কঠিয়া তুলি দলিয়াই চহা কৃষকে ক্ষোভ উজাৰিছে জলসিঞ্চন বিভাগৰ বিৰুদ্ধে (Poor Irrigation Facilities at Kaliabor) ।
ৰাইজৰ অভিযোগ, বিকল আঁচনি সুচল কৰিবলৈ জলসিঞ্চন বিভাগৰ নাই কোনো সদ্দিচ্ছা । ২০১৭ চনৰ আগষ্ট মাহৰ বানত ক্ষতিগ্ৰস্ত হোৱা হাতীমূৰাস্থিত কলং উত্তোলিত জলসিঞ্চন প্ৰকল্পৰে সংযোগী মূল নলা আজিও বিকল হৈ পৰি ৰৈছে (2nd largest irrigation scheme of ASIA at Kaliabor) ৷ এই নলা মেৰামতি নোহোৱাত হাহাকাৰ অৱস্থা হৈছে অঞ্চলটোৰ বহু কৃষক ৰাইজৰ (Failed irrigation project in Kaliabor)।
আনকি হাতীমূৰাৰ পৰা অহা মূল নলাৰ বেছিভাগ অংশই হাবি-বননিৰে ভৰি পৰিছে । কিন্তু ইমানৰ পাচতো কাণসাৰ নাই বিভাগীয় বৰমূৰীয়াসকলৰ ৷ এই অভিযোগ গঞা ৰাইজৰ ৷ তথ্য অনুসৰি, ১৯৭৩ চনতে কলিয়াবৰৰ হাতীমূৰাত স্থাপন কৰা হৈছিল এছিয়াৰ দ্বিতীয় সৰ্ববৃহৎ কলং উত্তোলিত জলসিঞ্চন আঁচনি ।
লগতে পঢ়ক : জলসিঞ্চনৰ বিকল প্ৰকল্প: হাহাকাৰ কলিয়াবৰৰ কৃষকৰ
২১,৪৮০ হেক্টৰ কৃষিভূমিত পানী যোগান ধৰিবৰ বাবে স্থাপন কৰা হৈছিল বৃহৎ জলসিঞ্চন আঁচনিখন । কিন্তু এতিয়া এই চৰকাৰী আঁচনিখনৰ লাওলোৱা অৱস্থা ৷ খৰাং পৰিস্থতিৰ বাবে পথাৰতে শুকাই গৈছে কঠিয়া । ঠায়ে-ঠায়ে পথাৰত মেলিছে বৃহৎ ফাঁট । পৰিণতিত কলিয়াবৰৰ মাধতাৰী গাঁৱৰ লগতে কলিয়াবৰৰ ভিন্ন গাঁৱৰ পথাৰত জলসিঞ্চনৰ অভাৱত নষ্ট হৈছে কেবাডৰাও খেতি ।
উল্লেখ্য যে, হাতীমূৰাৰ কলং উত্তোলিত জলসিঞ্চন আঁচনিয়ে আৰম্ভণিৰে পৰাই আশা কৰা ধৰণে স্থানীয় কৃষক ৰাইজক লাভান্বিত কৰা নাই । এক কোটি একচল্লিশ লাখ টকাৰ আনুমানিক ব্যয় সাপেক্ষে নিৰ্মাণ কৰা হৈছিল এই আঁচনিখন ৷ কিন্তু কাৰিকৰী দিশটোৰ প্ৰতি বিশেষ গুৰুত্ব নিদিয়াৰ ফলতেই চৰকাৰী হিচাপ মতে মুঠ ২১,৪৮০ হেক্টৰ কৃষিভূমি সাঙুৰি লৈছিল এই প্ৰকল্পটোৱে ৷
কিন্তু বৃহৎ অঞ্চলটোৰ বহু কৃষিভূমিত আৰম্ভণিৰে পৰা জলসিঞ্চনৰ এটোপালো পানী নপৰিলগৈ (Collapse of irrigation project at Kaliabor) । আনকি বিভিন্ন অঞ্চলত আঁচনিখনৰ নলা নিৰ্মাণৰ বাবে মাটি অধিগ্ৰহণ কৰাৰ ফলত বহু কৃষক সৰ্বস্বান্তও হ’ল । কিন্তু এইবোৰলৈ যে কোনো কাণসাৰেই নাই বিভাগীয় কৰ্মচাৰীৰ ৷
একাংশ দুৰ্নীতি পৰায়ণ বিষয়া-কৰ্মচাৰী তথা ৰাইজৰ প্ৰতিনিধিৰ বাবে প্ৰকৃত খেতিয়কৰ এতিয়া আলৈ-আথানিৰ সীমা নাইকিয়া হৈছে । এফালে পথাৰত নাই পানী, আনফালে কৃষকৰ প্ৰমাণ-পত্ৰ তথা তথ্য-পাতিৰ বাবে বিভাগৰ টনাটনি । নিৰুপায় চহা একাংশ কৃষক ৷
লগতে পঢ়ক : Poor Irrigation Facilities: জলসিঞ্চন বিভাগৰ হেমাহিত অতিষ্ঠ কলিয়াবৰৰ কৃষক ৰাইজ
