জুৰীয়াত যৌতুকৰ বলি মেধাৱী ছাত্ৰী

পিতৃগৃহৰ পৰা যৌতুক হিচাপে ২ লাখ টকা আনিবৰ বাবে বিভিন্ন ধৰনে হেঁচা প্ৰয়োগ কৰাৰ পাচতো যৌতুকৰ টকা আনি নিদিয়াত স্বামী আৰু শাহুৱেকে হাত ভৰি বান্ধি বিষাক্ত দ্ৰব্য সেৱন কৰোৱাই হত্যাৰ চেষ্টা চলোৱাৰ অভিযোগ হালিমা খাতুনক ৷

নগাঁও,২৬ মে': জুৰীয়াৰ এগৰাকী মেধাৱী ছাত্ৰীৰ কৰুণ কাহিনী । যৌতুকৰ বাবে হত্যাৰ চেষ্টা স্বামীৰ । গুৱাহাটী মেডিকেল কলেজ হাস্পতালত মৃত্যুৰ সৈতে যুঁজ ছাত্ৰী গৰাকীৰ । উল্লেখ্য যে, জুৰীয়াৰ শিঙাৰীৰ হালিমা খাতুন নামৰ ছাত্ৰী গৰাকীয়ে হাইস্কুল শিক্ষান্ত পৰীক্ষাত সুখ্যাতিৰে প্ৰথম বিভাগত উৰ্ত্তীণ হোৱাৰ লগতে সদ্য ঘোষিত উচ্চতৰ মাধ্যমিক পৰীক্ষাতো বিভিন্ন ধৰণৰ নিৰ্যাতনৰ সন্মুখীন হৈও দ্বিতীয় বিভাগত উৰ্ত্তীণ হৈছিল । কিন্তু এই গৰাকী ছাত্ৰীৰ জীৱনলৈ নামি আহিল কাল ধুমুহা । স্বামীৰ অত্যাচাৰত দিশহাৰা হোৱা ছাত্ৰী গৰাকীয়ে এতিয়া মৃত্যুৰ সৈতে যুঁজিছে গুৱাহাটী মেডিকেল কলেজ হাস্পতালত ।

উল্লেখ্য যে, বিগত প্ৰায় 6 মাহ মান পূৰ্বে আনছাৰুল নামৰ প্ৰেমিকগৰাকীৰ সৈতে বিবাহপাশত আৱদ্ধ হৈছিল হালিমা খাতুন। বিয়াৰ তিনি-চাৰিমাহ মান পাচতেই স্বামী আনছাৰুলে যৌতুক বিচাৰি আৰম্ভ কৰিছিল শাৰীৰিক আৰু মানসিক নিৰ্যাতন ৷ পিতৃ গৃহৰ পৰা যৌতুক হিচাপে ২ লাখ টকা আনিবৰ বাবে বিভিন্ন ধৰনে হেঁচা প্ৰয়োগ কৰাৰ পাচতো যৌতুকৰ টকা আনি নিদিয়াত স্বামী আৰু শাহুৱেকে হাত ভৰি বান্ধি বিষাক্ত দ্ৰব্য সেৱন কৰোৱাই হত্যাৰ চেষ্টা চলোৱাৰ অভিযোগ হালিমা খাতুনক । ঘটনা সন্দৰ্ভত ভুক্তভোগীৰ পৰিয়ালে জুৰীয়া আৰক্ষী থানাত গোচৰ ৰুজু কৰে যদিও আৰক্ষীৰ তদন্ত লেহেমীয়া হোৱাৰ অভিযোগ উত্থাপিত কৰে পৰিয়ালে ।