কলিয়াবৰ, 13 জুন : নব্বৈ দশকতে নিৰ্মাণ কৰা হৈছিল কলিয়াবৰ মহকুমাৰ মিছা পশু চিকিৎসা কেন্দ্ৰ । কিন্তু বিভাগীয় বিষয়া-কৰ্মচাৰীৰ চূড়ান্ত হেমাহিৰ বাবেই চিকিৎসা কেন্দ্ৰটো এতিয়া মৃতপ্ৰায় । নব্বৈ দশকতে তদানীন্তন মুখ্যমন্ত্ৰী প্ৰফুল্ল মহন্তৰ দিনত স্থাপিত হোৱা এই পশু চিকিৎসা কেন্দ্ৰটোৰ দীৰ্ঘদিন ধৰি হোৱা নাই কোনো মেৰামতি । জহি-খহি যোৱা বেৰ, দুৱাৰ-খিৰিকী, চৌহদৰ চিন-মোকাম নথকা এটা বিধ্বস্ত ঘৰ, ভঙা খিৰিকীৰে দেখা কেন্দ্ৰটোৰ এলান্ধূ-ধূলিৰে ভৰা কোঠাৰ ভিতৰৰ ৰূপেই ইয়াৰ সত্যতা প্ৰতিপন্ন কৰে ।
ৰাজ্যত যিটো সময়ত পশু চিকিৎসালয়সমূহৰ নৱ-নিৰ্মিত ভৱন চকুত পৰিছে তাৰ বিপৰীতে নৱ-নিৰ্মাণৰ দূৰৰ কথা, এই চিকিৎসা কেন্দ্ৰটো আৰম্ভণিৰে পৰা মেৰামতিৰ মুখেই নেদেখাৰ অভিযোগ উত্থাপন হৈছে ।
তদুপৰি চিকিৎসকৰ অনিয়মীয়া উপস্থিতিয়ে জ্বলা-কলা খোৱাইছে অঞ্চলবাসীক । পোহনীয়া জীৱ-জন্তুৰ বেমাৰ হ'লে চিকিৎসকক পোৱাটো ভাগ্যৰ কথা বুলিহে মন্তব্য কৰিছে স্থানীয় বাসিন্দাই ৷
ইফালে পশু চিকিৎসা কেন্দ্ৰটোৰ চিকিৎসক শ্যাম সুন্দৰ পাণ্ডেই চিকিৎসা কেন্দ্ৰটোৰ মেৰামতি বা আনুসংগিক উন্নয়নৰ প্ৰতি কোনো আগ্ৰহ নথকাৰো অভিযোগ উত্থাপন কৰিছে স্থানীয় বাসিন্দাই ।
উল্লেখ্য যে, ১৯৮৫ চনত ৰাজ্যত অগপ দলে চৰকাৰ গঠন কৰাৰ পাছত তদানীন্তন মুখ্যমন্ত্ৰীৰ প্ৰফুল্ল মহন্তই প্ৰতিনিধিত্ব কৰা কলিয়াবৰ সমষ্টিত ভালেমান উন্নয়নমূলক কাম হাতত লৈছিল । কিন্তু বিভাগীয় হেমাহি তথা বিষয়া-কৰ্মচাৰীৰৰ সদিচ্ছাৰ অভাৱৰ বাবেই সেই উন্নয়নৰ পৰা বঞ্চিত হৈ ৰৈছে সৰ্বসাধাৰণ ।
লগতে পঢ়ক: তিতাবৰৰ আকাশত শীঘ্ৰে উৰিব চি প্লেন
