কলিয়াবৰত ভয়ংকৰ গৰাখহনীয়াত শংকিত নৈপৰীয়া ৰাইজ

বৰঘূলীত বৰলুইতৰ গৰা-খহনীয়াত শংকিত হৈ পৰিছে নৈপৰীয়া ৰাইজ ৷ চকুৰ পচাৰতে চপৰা-চপৰে খহি আছে ব্ৰহ্মপুত্ৰৰ গৰা ৷ মুৰে কপালে হাত দিব লগীয়া পৰিস্থিতিৰ সৃষ্টি হৈছে নৈপৰীয়া ৰাইজৰ ৷

কলিয়াবৰ, 26 মেঃ নগাঁও জিলাৰ কলিয়াবৰৰ বৰঘূলীত ব্ৰহ্মপুত্ৰৰ ভয়াৱহ গৰাখহনীয়া ৷ চপৰা-চপৰে ব্ৰহ্মপুত্ৰই খহাই নিছে নৈপৰীয়া ৰাইজৰ মাটি-ভেটি ৷ ভয় শংকাৰ মাজতেই এতিয়া দিন অতিবাহিত কৰিবলগীয়া পৰিস্থিতিৰ সৃষ্টি হৈছে নৈপৰীয়া ৰাইজৰ ৷

কলিয়াবৰৰ বৰঘূলীত বৰলুইতৰ গৰা-খহনীয়াই ক্ৰমান্বয়ে ভয়ঙ্কৰ ৰূপ লৈছে ৷ বিগত প্ৰায় দুই দশক ধৰি অঞ্চলটোত হোৱা বৰলুইতৰ গৰাখহনীয়াত ঘৰ-ভেটি উচন হৈছে কেইবা সহস্ৰাধিক পৰিয়ালৰ। ব্ৰহ্মপুত্ৰৰ বুকুত জাহ গৈছে বিশ হাজাৰ হেক্টৰৰো অধিক কৃষিভূমি । দিনক দিনে সংকুচিত হৈ আহিছে বৰঘূলীৰ ভৌগলিক মানচিত্ৰ । চৰকাৰেও অঞ্চলটোৰ সুৰক্ষাৰ বাবে জলসম্পদ বিভাগৰ জৰিয়তে ব্যয় কৰিছে কোটি-কোটি টকা । কিন্তু, চৰকাৰে অঞ্চলটোৰ সুৰক্ষাৰ বাবে অনুমোদন জনোৱা আচঁনিসমূহ একাংশ ঠিকাদাৰে সোণৰ কণী পৰা হাঁহলৈ ৰূপান্তৰিত হোৱাৰ অভিযোগ উত্থাপন কৰিছে স্থানীয় ৰাইজৰ ৷

আঁচনিসমূহৰ উপযুক্ত ব্যৱহাৰ নোহোৱাৰ বাবেই বৰঘূলিৰ ৰাইজে বছৰৰ পাছত বছৰ ধৰি দুৰ্ভোগ ভূগি অহা বুলি ক্ষোভ প্ৰকাশ কৰিছে ৷ স্বয়ং জলসম্পদ মন্ত্ৰীৰ গৃহ সমষ্টিতে একাংশ ঠিকাদাৰক নাকী লগাব নোৱাৰাতো চৰম পৰিতাপৰ বিষয় বুলি স্থানীয় ৰাইজে ক্ষোভ প্ৰকাশ কৰিছে । ব্ৰহ্মপুত্ৰৰ জলপৃষ্ঠ বৃদ্ধি হোৱাৰ লগে লগে পুনৰ গৰাখহনীয়াৰ কবলত পৰিছে কলিয়াবৰৰ বৰঘূলী অঞ্চল । ইতিমধ্যে ব্ৰহ্মপুত্ৰৰ ভয়ংকৰ গৰাখহনীয়াত ক্ৰমান্বয়ে মাটি ভেটি উচন কৰা ঘটনাক লৈ শংকিত হৈ পৰিছে বৰঘূলীৰ নৈপৰীয়া ৰাইজ ৷

মহাবাহুৰ এই খহনীয়া অব্যাহত থাকিলে বছৰৰ শেষলৈ বৰঘূলী অঞ্চলৰ অস্তিত্বই নাথাকিব বুলি সাংবাদিকৰ আগত দুখ প্ৰকাশ কৰে স্থানীয় লোকসকলে ৷ অতি শীঘ্ৰে উক্ত অঞ্চলত গৰাখহনীয়া প্ৰতিৰোধ কৰিবলৈ জলসম্পদ মন্ত্ৰী কেশৱ মহন্তৰ লগতে বিভাগীয় কৰ্তৃপক্ষক আহ্বান জনাইছে স্থানীয় ৰাইজে ৷

লগতে পঢ়ক- সনাতন ডেকাৰ হত্যাকাণ্ডৰ লগত জড়িত তৃতীয়জন অভিযুক্ত আটক