কলিয়াবৰ,৮ ছেপ্টেম্বৰ: কলিয়াবৰৰ শাকমুঠি গাঁৱৰ সমাজকৰ্মী, উদীয়মান সাংস্কৃতিক কৰ্মী, অঙ্কীয়া ভাওনাৰ সুদক্ষ কুশীলৱ অৰূপজ্যোতি শইকীয়াৰ আজি প্ৰায় ১ বজাত হৃদৰোগত আক্ৰান্ত হৈ ৪০ বছৰ বয়সত আকস্মিকভাৱে বিয়োগ হয় । কলিয়াবৰৰ সামাজিক, সাংস্কৃতিক, ধৰ্মীয় অনুষ্ঠানৰ লগত ওতঃপ্ৰোতভাৱে জড়িত থকা উদীয়মান যুৱকগৰাকী অঙ্কীয়া ভাওনাৰ সুদক্ষ ভাৱৰীয়া আছিল ।
কলিয়াবৰ জিলা সত্ৰ মহাসভাৰ অন্যতম যুৱানুষ্ঠান সমন্বিত যুৱতীৰ্থ কলিয়াবৰৰ জন্মলগ্নৰ পৰাই জড়িত থকাৰ লগতে বৰ্তমান উপ-সভাপতিৰূপে দায়িত্ব পালন কৰি কলিয়াবৰৰ বিভিন্ন অঞ্চলৰ যুৱকসকলক একত্ৰিত কৰি এক সাংস্কৃতিক অনুষ্ঠান গঠনৰ বাবে অহোপুৰুষাৰ্থ প্ৰচেষ্টা কৰি আহিছিল । দক্ষযজ্ঞ নাটত শিৱ, ৰাম বিজয়ত জনক, নৃসিংহ যাত্ৰাত জয়-বিজয়কে প্ৰমুখ্য কৰি শতাধিক নাটত বিভিন্ন চৰিত্ৰত ভাও দি কলিয়াবৰৰ বিভিন্ন অনুষ্ঠানৰ লগতে অসম তথা ভাৰতৰ বিভিন্ন স্থানত সুদক্ষ অভিনয় কৰি ৰাইজৰ সমাদৰ লাভ কৰিবলৈ সক্ষম হৈছিল ।
নিজৰ শাকমুঠি গাঁৱৰ সামাজিক, সাংস্কৃতিক, ধৰ্মীয়, ক্ৰীড়া অনুষ্ঠানতো ওতঃপ্ৰোতভাৱে জড়িত থাকি কাম কৰা সদা হাস্যমুখী, বিনয়ী, সৰবৰহী যুৱকজনৰ আকস্মিক বিয়োগত অঞ্চলটোৰ ৰাইজ শোকাস্তব্ধ হৈ পৰে । এটা ব্যক্তিগত প্ৰতিষ্ঠানত কৰ্মৰত হৈয়ো সমাজৰ বাবে কাম কৰা উদীয়মান সাংস্কৃতিক কৰ্মীগৰাকীৰ বিয়োগত মন্ত্ৰী কেশৱ মহন্ত, সমন্বিত যুৱতীৰ্থ কলিয়াবৰৰ উপদেষ্টা প্ৰমুখ্য কৰি সমন্বিত যুৱতীৰ্থ, কলিয়াবৰৰ সকলো বিষয়ববীয়া-সদস্য, কলিয়াবৰ জিলা সত্ৰ মহাসভা,কলিয়াবৰ প্ৰেছ ক্লাৱ, শাকমুঠি গাঁৱৰ ৰাইজ, যুৱক-যুৱতীকে প্ৰমুখ্য কৰি কলিয়াবৰৰ বিভিন্ন ব্যক্তি-অনুষ্ঠানে শোক প্ৰকাশ কৰে । মৃত্যুৰ সময়ত তেখেতে পিতৃ, পত্নী, দুই কণমানি পুত্ৰ, ইষ্ট-কুটুম্ব ইহ সংসাৰত এৰি থৈ যায় ।
লগতে পঢ়ক: Bhupen Hazarika birth anniversary: মৰিগাঁৱত গীতে-মাতে সুধাকণ্ঠৰ ৯৭ সংখ্যক জন্মবাৰ্ষিকী উদযাপন
