নগাঁও, 31 ডিচেম্বৰঃ বছৰৰ অন্তিমটো দিনটো অব্যাহত থাকিল সংশোধিত নাগৰিকত্ব আইনৰ বিৰুদ্ধে প্ৰতিবাদ ৷ নগাঁৱত এই আইন বাতিলৰ দাবীত অসম প্ৰদেশ কংগ্ৰেছৰ পদযাত্ৰা ৷ শদিয়াৰ পৰা অসম প্ৰদেশ কংগ্ৰেছৰ নেতৃত্বত নাগৰিকত্ব সংশোধনী আইনৰ বিৰুদ্ধে আৰম্ভ কৰিছে বিশাল পদযাত্ৰা ৷ মঙলবাৰে নগাঁও চহৰৰ পৰা কঁপাই যোৱা পদযাত্ৰাত অংশগ্ৰহণ কৰে প্ৰদেশ কংগ্ৰেছৰ সভাপতি ৰিপুন বৰা, প্ৰাক্তন মন্ত্ৰী ৰকিবুল হুছেইন, বিধায়ক নুৰুল হুদাসহ কেইবাগৰাকী কংগ্ৰেছৰ জ্যেষ্ঠ নেতা ৷
প্ৰধানমন্ত্ৰী নৰেন্দ্ৰ মোডী নেতৃত্বৰ কেন্দ্ৰীয় চৰকাৰে অসমবাসীক বাধ্য কৰিছে ৰাজপথত আন্দোলন কৰিবলৈ ৷ বছৰৰ শেষৰ দিনটোতো ৰাজপথত আন্দোলন কৰিবলগীয়া হোৱাটো অসমবাসীৰ বাবে দুৰ্ভাগ্যজনক বুলি মন্তব্য কৰে প্ৰদেশ কংগ্ৰেছৰ সভাপতি ৰিপুন বৰাই ৷ লগতে আগন্তুক 2021 চনৰ বিধানসভা নিৰ্বাচনত অসমত এশখন আসন পাব বুলি ঘোষণা কৰা মন্ত্ৰী ডঃ হিমন্ত বিশ্ব শর্মাকো প্ৰত্যুত্তৰ ৰিপুন বৰাৰ ৷ যদি মন্ত্ৰীগৰাকীৰ ইমানেই জনপ্ৰিয়তা আছে তেন্তে তেজপুৰত ডেৰ কিলোমিটাৰ পথ হেলিকপ্টাৰেৰে কিয় যাব লগা হ’ল বুলিও প্ৰশ্ন ৰিপুন বৰাৰ ৷ ইয়াৰোপৰি এই প্ৰতিবাদী পদযাত্ৰাত পদযাত্ৰাত অংশগ্ৰহণ কৰি প্ৰাক্তন মন্ত্ৰী ৰকিবুল হুছেইনও মন্তব্য প্ৰদান কৰে ৷ আৰক্ষীৰ আবেষ্টনীত থাকি চৰকাৰৰ মন্ত্ৰীসকলে প্ৰতিবাদকাৰীৰ ওপৰত দমন নীতি চলোৱা বুলি মন্তব্য ৰকিবুল হুছেইনৰ ৷ আনহাতে দমন নীতিৰ বিপৰীতে চৰকাৰে জাতিধ্বংসী নাগৰিকত্ব আইন বাতিল কৰক বুলিও মন্তব্য কৰে ৰকিবুল হুছেইনে ৷
