চামগুৰি,9 ডিচেম্বৰ : নগাঁও জিলাৰ চামগুৰিৰ বিভিন্ন অঞ্চলত দীৰ্ঘদিন ধৰি চলি থকা হাতী-মানুহৰ সংঘাতৰ মাজতে বন্যপ্ৰাণীৰ প্ৰতি থকা মানুহৰ মৰমৰ এক উৎকৃষ্ট নিদৰ্শন দাঙি ধৰিলে উদমাৰীবাসীয়ে । বুধবাৰে প্ৰকৃতি প্ৰেমী যুৱক বিনোদ দুলু বৰা আৰু উদমাৰী বন বিভাগৰ কৰ্মচাৰীয়ে বোকাত আবদ্ধ হৈ থকা ভৰিত আঘাতপ্ৰাপ্ত অৱস্থাত উদ্ধাৰ কৰে এটি কণমানি বন্যহস্তীৰ পোৱালী ।
বন্যহস্তীৰ জাকৰ পৰা ভৰিত আঘাত পোৱাৰ পাচত বোকাত আবদ্ধ হৈ পৰিছিল হাতী পোৱালীটো । বহু চেষ্টা কৰিও মাকে উদ্ধাৰ কৰিব নোৱাৰিলে হাতী পোৱালীটো । পুৱাৰ ভাগতে পোৱালীটো স্থানীয় ৰাইজে প্ৰত্যক্ষ কৰি ততালিকে বন বিভাগক খবৰ দিয়ে ।
বন বিভাগে খবৰ পোৱাৰ লগে লগে চাপানালাৰ প্ৰকৃতি প্ৰেমী যুৱক বিনোদ দুলু বৰাৰ সহযোগত ঘটনাস্থলীত উপস্থিত হৈ হাতী পোৱালীটো উদ্ধাৰ কৰে। কোনো ধৰণৰ হানি-বিঘিনি নোহোৱাকৈ বন্যহস্তীৰ পোৱালীটো চিকিৎসাৰ বাবে কাজিৰঙাস্থিত পশু চিকিৎসালয়লৈ নিয়াৰ ব্যৱস্থা কৰে বন বিভাগৰ লগতে প্ৰকৃতি প্ৰেমী যুৱক বিনোদ দুলু বৰাই ।
লগতে পঢ়ক : কলগাছিয়াত ব্যৱহাৰৰ অনুপযোগী কোটিটকীয়া পকী দলং
