গুৱাহাটী, ৭মাৰ্চঃ অগপৰ প্ৰতিষ্ঠাপক সভাপতি তথা প্ৰাক্তন মুখ্যমন্ত্রী প্ৰফুল্ল কুমাৰ মহন্তক বঢ়মপুৰ সমষ্টিৰ পৰা এইবাৰ টিকট দিয়া নহল। সমষ্টিটোত বিজেপিয়ে নিজা প্ৰাৰ্থী দিছে । অগপই সমষ্টিটো এৰি দিয়াৰ লগে লগে প্ৰাক্তন মুখ্যমন্ত্রী মহন্তই ক্ষোভ আৰু অসন্তুষ্টিৰে কংগ্ৰেছৰ যোগেদি সমষ্টিটোত প্ৰতিদ্বন্দ্বিতা কৰাৰ কুচ-কাবাজ আৰম্ভ কৰিছে ।
দেওবাৰে ৰাজ্যিক বিজেপিৰ গুৱাহাটীৰ খানাপাৰাস্থ নিৰ্বাচনী সংবাদকোষৰ কাৰ্যালয়ত আয়োজন কৰা মিত্রদলৰ এখন যৌথ সংবাদমেলত এই সন্দৰ্ভত অগপৰ সভাপতি অতুল বৰাক প্ৰশ্ন কৰা হৈছিল । উত্তৰত সভাপতি বৰাই কয়- ' আমি কোনো চক্ৰান্ত কৰি তেওঁক টিকটৰ পৰা বঞ্চিত কৰা নাই । আমি মিত্রদলে জয়ৰ সম্ভাৱনীয়তাৰ ওপৰত গভীৰভাৱে বিশ্লেষন কৰিছো । ব্যক্তি বিশেষক লৈ কৰা নাই । সম্ভাৱনীয়তাৰ ক্ষেত্রত গুৰুত্ব দিয়া হৈছে । বঢ়মপুৰ সমষ্টিটো দীৰ্ঘদিন ধৰি আমাৰ দখলত আছিল । কিন্তু এতিয়া তাত আমাৰ স্থিতি সবল নহয় । বিগত লোকসভা নিৰ্বাচনত প্ৰফুল্ল কুমাৰ মহন্তই নিজৰ গণতান্ত্রীক অধিকাৰ সাব্যস্ত নকৰাৰ পাছৰে পৰা তেওঁ দলটোৰ পৰা ক্ৰমাৎ আঁতৰি গৈছে । মিত্রদলৰ মাজত হোৱা আলোচনাৰ মাজেৰে আসন বুজাবুজি হৈছে । আনহাতে তেওঁৰ স্বাস্থ্যজনিত কথাও আছে ।'
উল্লেখ যে, এইবাৰ বঢ়মপুৰ সমষ্টিত বিজেপিয়ে জিতু গোস্বামীক প্ৰাৰ্থীত্ব প্ৰদান কৰিছে । ইফালে সমষ্টিটো হেৰুৱাই প্ৰাক্তন মুখ্যমন্ত্রী মহন্তই কংগ্ৰেছৰ মহাজোঁটবন্ধনৰ অংশীদাৰ হোৱাৰ বাবে যোগাযোগ অব্যাহত ৰাখিছে ।
