নগাঁও, 6 অক্টোবৰ: ৰাজ্যত পুনৰ সংঘটিত হৈছে চিকিৎসকক প্ৰহাৰৰ ঘটনা ৷ কৰ’ণা সৃষ্ট পৰিৱেশৰ মাজতো নিৰৱচ্ছিন্নভাৱে দায়িত্বত নিয়োজিত চিকিৎসকসকলে অহৰহ আগবঢ়াই আহিছে চিকিৎসা সেৱা ৷ একপ্ৰকাৰ ত্ৰাণকৰ্তাৰ ৰূপত স্থান দিয়া চিকিৎসকসকলক একাংশ অবিবেচক লোকে কৰ্তব্যক্ষেত্ৰত অপদস্থ কৰাৰ ঘটনায়ো লাভ কৰি আহিছে চৰ্চা ৷ ডাঃ দেৱেন দত্তৰ হত্য়াৰ চূড়ান্ত ৰায়দান ঘোষণা নৌহওঁতেই পুনৰ তেনে এক ঘটনা সংঘটিত হৈছে নগাঁৱত । নগাঁৱৰ ম’হখুলিৰ মাতৃ আৰু শিশু চিকিৎসালয়ৰ ডাঃ চেমিম নামৰ এগৰাকী মহিলা চিকিৎসকক মঙলবাৰে পুৱা চিকিৎসালয়ৰ চৌহদতে শাৰীৰিকভাৱে অপদস্থ কৰাৰ অভিযোগ উত্থাপন হৈছে ৰেজিনা বেগম নামৰ এগৰাকী প্ৰসূতিৰ আত্মীয়ৰ বিৰুদ্ধে । ইয়াতে ক্ষান্ত নাথাকি প্ৰসূতিগৰাকীৰ আত্মীয়ই চিকিৎসকগৰাকীৰ বাহনখনো ক্ষতিগ্ৰস্ত কৰাৰ চেষ্টা চলায় । যি ঘটনাই এতিয়া সমগ্ৰ নগাঁৱতে প্ৰতিক্ৰিয়াৰ সৃষ্টি কৰিছে ।
উল্লেখ্য যে, জখলাবন্ধাৰ পৰা অহা এগৰাকী প্ৰসূতিক জখলাবন্ধা চিকিৎসালয়ৰ পৰা তেজপুৰ চিকিৎসা মহাবিদ্যালয় হাস্পতাললৈ উন্নত চিকিৎসাৰ বাবে প্ৰেৰণ কৰাৰ পৰামৰ্শ প্ৰদান কৰা হৈছিল যদিও প্ৰসূতিগৰাকীৰ আত্মীয়ই তেজপুৰৰ পৰিৱৰ্তে নগাঁৱলৈ নিয়ে । কিন্তু প্ৰসূতিগৰাকীৰ ৰক্তচাপ বৃদ্ধি হৈ থকাত নগাঁৱত অস্ত্ৰোপচাৰ অসম্ভৱ বুলি ব্যক্ত কৰে চিকিৎসকগৰাকীয়ে ৷ চিকিৎসকৰ এই কথাতে খড়্গহস্ত হৈ পৰে প্ৰসূতিগৰাকীৰ পৰিয়াল আৰু চিকিৎসকগৰাকীক শাৰীৰিকভাৱে অপদস্থ কৰে ৷ ইপিনে এই সন্দৰ্ভত আৰক্ষী থানাত এজাহাৰ দাখিল কৰা বুলি সংবাদ মাধ্যমক জানিবলৈ দিছে ডাঃ চেমিমে ।
ইপিনে প্ৰসূতিগৰাকীক চিকিৎসা প্ৰদানৰ ক্ষেত্ৰত গাফিলতি কৰাৰ অভিযোগ উত্থাপন কৰে প্ৰসূতিগৰাকীৰ আত্মীয়ই । তদুপৰি মঙলবাৰে পুৱা প্ৰসূতিগৰাকীক ভৰ্তি কৰোৱা হয় নগাঁৱৰ এখন ব্যক্তিগত নাৰ্ছিং হোমত ৷
লগতে চাওকঃ SI কেলেংকাৰীঃ দ্বিবন ডেকাক CIDৰ ন্যায়িক জিম্মালৈ প্ৰেৰণ
