কলিয়াবৰ,১৭ জুলাই: মঙলবাৰে মাজ নিশা এক শোকাকূল পৰিৱেশৰ মাজত সম্পূৰ্ণ সামৰিক মৰ্যদাৰে অসমৰ সেনা চুবেদাৰ প্ৰদীপ ভূঞাৰ শেষকৃত্য সম্পন্ন কৰা হয়। হিমাচল প্ৰদেশত কৰ্মৰত অৱস্থাত ভূমিস্খলনত মৃত্যু হৈছিল চুবেদাৰ প্ৰদীপ ভূঞাৰ।
সামৰিক বিষয়াসকলে মৃত জোৱান গৰাকীক গুৱাহাটীৰ লোকপ্ৰিয় গোপীনাথ বৰদলৈ আন্তৰাষ্ট্ৰীয় বিমান বন্দৰত শেষ শ্ৰদ্ধা নিবেদন কৰাৰ পাচত মঙলবাৰে মাজ নিশা প্ৰায় এক বজাত কলিয়াবৰৰ মিছাৰ বাসগৃহ আহি পায়হি প্ৰদীপ ভূঞাৰ মৃতদেহ। মৃত জোৱান গৰাকীৰ দুই কন্য সুমন জ্যোতি ভূঞা আৰু দীক্ষিতা ভূঞাই তেওঁৰ মুখাগ্নি কৰে। উল্লেখ্য যে যোৱা ১৪ জুলাইত হিমাচল প্ৰদেশৰ ৰাজধানী চিমলাৰ পৰা ৪৫ কিলোমিটাৰ নিলগৰ চ'লানত হোৱা এক ভয়ানক ভূমিস্খলনৰ ফলত কেইবাটাও বাসগৃহ খহি পৰিছিল । সেই বাসগৃহ সমূহৰ ধ্বংসস্তুপৰ মাজতে আন ১৪ জন লোকৰ সৈতে উদ্ধাৰ হৈছিল সেনা জোৱান প্ৰদীপ ভূঞাৰ মৃতদেহ । ১৯৮৮ চনত চতুৰ্থ অসম ৰেজিমেণ্টত যোগদান কৰা মিছাৰ ভূঞাপট্টীৰ নিৱাসী প্ৰয়াত ভূঞা শেহতীয়াকৈ চুবেদাৰ পদলৈ পদোন্নতি হৈছিল।
