নগাঁও, ১১ ডিচেম্বৰ: ৮ ডিচেম্বৰত ছবিগৃহত মুক্তি লাভ কৰিছে অসমীয়া ছবি ‘নেলীৰ কথা’ ৷ কিন্তু মুক্তিৰ পিচতে এতিয়া ছবিখনৰ বিৰুদ্ধে ষড়যন্ত্ৰত নামি পৰিছে এটা চক্ৰ । ১৯৮৩ চনত সংঘটিত নেলীৰ গণহত্যাক মূল বিষয় হিচাপে লৈ নিৰ্মাণ কৰা ছবি নেলীৰ কথা বহু দৰ্শকে আকোৱালি লোৱাৰ বিপৰীতে একাংশই ছবিখনৰ বিৰুদ্ধে ষড়যন্ত্ৰত লিপ্ত হোৱাৰ গোন্ধ পাইছে ছবিখনৰ পৰিচালক পাৰ্থজিৎ বৰুৱাই ।
ইতিমধ্যে এই ছবিখন আন্তঃৰাষ্ট্ৰীয় চলচ্চিত্ৰ মহোৎসৱত প্ৰদৰ্শিত হৈছে যদিও অসমত ছবিখনৰ বিৰুদ্ধে একাংশই ষড়যন্ত্ৰত লিপ্ত হোৱাৰ অভিযোগ উত্থাপন কৰি আক্ষেপ প্ৰকাশ কৰিছে ছবি নিৰ্মাতা পাৰ্থজিৎ বৰুৱাই । কেৱল মানৱতাৰ জয়গানেৰে ইতিবাচক বাৰ্তা বিলোৱাৰ উদ্দেশ্যে নিৰ্মাণ কৰা ছবি নেলীৰ কথাক লৈ ই টি ভি ভাৰতৰ এক বিশেষ সাক্ষাৎকাৰত পাৰ্থজিৎ বৰুৱাই কয়, ‘‘এই ছবিখনৰ বিৰুদ্ধে এটা চক্ৰান্ত চলা যেন মোৰ অনুভৱ হয় ৷ কিন্তু কোনে এই চক্ৰান্ত চলাইছে সেয়া মই গ’ম নাপাওঁ ৷ মোৰ দুখ লাগিছে মই নেলীৰ কথা ছবিখনৰ জৰিয়তে সমাজখনক এক ইতিবাচক বাৰ্তা দিব বিচাৰিছো ৷ কিন্তু মই চৰকাৰ বিৰোধী, কোনো দল-সংগঠন বিৰোধী বা কোনো সম্প্ৰদায়ৰ বিৰুদ্ধে এই ছবিখন বনোৱা নাই ৷ তথাপিও মই এই ছবিখনৰ বিৰুদ্ধে চক্ৰান্তৰ গোন্ধ পাইছো ৷ কিন্তু ৰাইজে ছবিখন চালে গ’ম পাব যে মই সমাজত এটা ইতিবাচক বাৰ্তা বিলোৱাৰ উদ্দেশ্যেহে এই ছবিখন নিৰ্মাণ কৰিছো ৷’’
